Rashtriya Poshan Maah
hmang tha thlangchhuak
Directorate of Women & Child Development chuan Ningani khan Aizawlah Rashtriya Poshan Maah (National Nutrition Month) 2025 kharna hun hmangin Integrated Child Development Scheme (ICDS) kum 50 tlin an lawm nghal a. MLA VL Zaithanzama’n hmanpuiin Rashtriya Poshan Maah hmang tha zual district ho hnenah lawmman a hlan.
He hun hmanpuitu dang Cooperation commissioner & secretary Udit Prakash Rai chuan Aizawl Urban ICDS Project leh Tlangnuam ICDS Project hnuaia mi 10 hnenah naupang, Anganwadi Centre kal tha leh kal chhuakte hnenah lawmpuina – Vidhyarambn Certificate a hlan a. District level leh ICDS project level-a titha zual hnenah lawmman sem ni bawkin, Women & Child Development commissioner & secretary Lalzarmawii’n award hi a hlan.
Rashtriya Poshan Maah 2025 pual hian thupui ngaihpawimawh bik –
mawm , thlum leh al eitlem tura inzirtir; nupui fanaute hriselna atana mipa /pa mawhphurhna inzirtir; ECCE / ‘Zirtir la, Eitur tha pe rawh’ tih thupui hmanga zirtir; thing phun leh, nu hnute tui pawimawhna inzirtir chu thlan a ni.
Heng thupui behchhan hian district level-a Poshan Mah hmang tha leh ICDS kum 50 tlin lawmna puala intihsiaka lawmman siam a ni a. District level-a pakhatna Siaha district, pahnihna Serchhip district, pathumna Kolasib district.
ICDS project level-ah pakhatna West Phaileng ICDS Project; pahnihna Bilkhawthlir ICDS Project leh pathumna Thingsulthliah ICDS Project-an ni.
Rashtriya Poshan Maah hmang tha thlangchhuak
