Hachhek bial Phuldungsei khuaa Mizorama ration card nei paihsak an nihnaah ZPM sawrkar chuan hnam pawi a khawih tih MNF Legislature Party chuan a sawi. MNF Legislature Party (MLP) leader Lalchhamdama Ralte chuan Hachhek biala Mizo khaw hlun tak, Phuldungsei khuaah Mizoram ration card neitu mi 85 chu an ration card paih (delete) sak an ni a. He khua leh ami chengte hi Mizoram sawrkar hmasa ten voter ID, ration card adt. hun rei tak atanga an lo pek tawh an ni tih a sawi.
“A ram, khua hauh a ngai a, a mipui pawh hauh a tul. Tripura sawrkar chuan an ration card an delete sak duh lo. He hnam pawikhawihna lian takah hian ZPM sawrkar hian mawh a phur a. Thangharh se, ration card hi pe let se, tun hnu ah fimkhur se kan ti,” a ti.
Hachhek bialtu MLA Robert Romawia Royte chuan Phuldungsei khaw mite hi Tripura sawrkar chuan a ram chhunga awma ngaiin ration card mai ni lo, Aadhar card thlengin a siamsak a; a khaw mite hian Mizoram lama awm an duh zawk avangin Tripura sawrkar hnenah hian paih (delete) turin an ngen thin a, mahse an paih duh loa, Mizorama ration card leh Aadhar an neih tel pawh hi pawi an ti hran lo tih a sawi. Chutiang a nih laia Mizoram sawrkarin a lo paih hi, ram leh a chhunga chengte inchuhnaah thil tih chi loh a ni tih a sawi a ni.
MLP leader Lalchhamdama Ralte chuan Supply department-in buhfai lei tura tender a chhuah danah dan dinglai nasa taka bawhchhiat a ni tih a sawi bawk.
“Mizoram Public Procurement Rules 2020 chuan limited tender/ restricted tender hmangin cheng nuai 25 aia tam man thil lei a khap laiin, Supply department-in buhfai a leinaah hian he dan hi nasa taka an bawhchhiat bakah cheng nuai sangbi man tender-ah earnest money pawh tender chhangtute an dah tir lo,” a ti.
Tender chhang hniam ber RL Store hnawlin, a aia Rs. 149.50 a chhang sang zawk LZ Juice pek a ni tih a sawi a. Department-in RTI zawhna a chhannaah, tender chhang hniam ber an thlan loh chhan chu buhfai ‘C’ grade supply tura a chhan vang nia tarlan a nih laiin, RL Store tender chhanna copy-a a lan danin, buhfai ‘A’ grade supply tura chhanna pe an ni tih a lang thung tih a sawi.
“Buhfai supply chungchanga dan bawhchhiatna hrang hrang avang leh tender chhang hniam ber supply hna pe loa, a chhang sang zawk pek a nih avanga sawrkar sum hloh hi a tam tham hle,” a ti.
He thilah hian Supply minister chuan a inrawlh lo niin sawi mah se, State Purchase Advisory Board thukhawm minute file chu a pawmpui tih a hming a ziah hnannaah a lang tih MLP leader hian a sawi a. Mipui leh a department hnuaia SPAB zahlohnaah an ngai a, mawhphurhna a la ngam lo chu vanduaithlak an tih thu a sawi bawk.
ZPM sawrkarin card var hmangtuten buhfai kg. ah Rs.15-a an lei thin, Rs.30 (100%) a tihsan chu a uchuak hle tih MNF MLA-te hian an sawi a. MNF sawrkar lai khan Finance department atangin card var-a la ration buhfai man ti to tura rawtna hi a lut a, mipui nghawng thil a nih avang leh state-in chhiatna leh harsatna bik a tawh hran loh avangin an hnawl tih an sawi. Supply department-in buhfai man ti to tura hma a la pawh chu Finance chan tur nia a lan avangin Allocation of Business Rules zirchiang se an duh tih an sawi bawk.
Ration card inpaih saknaah ZPM-in hnam pawi a khawih – MNF Legislature Party
