Sawrkar hna atanga pension tawh, Tourism director atana sawrkarin a rawih nawn leh chu an duh loh avangin Mizo Zirlai Pawl chuan Tourism Directorate-a thawktute pisa kai tur chu Thawhtanni atang khan an dang a, an ngenna a hlawhtlin loh chuan dan chhunzawm zel an tum.
MZP Gen. Hqrs. hruaitute chuan, Commerce & Industries additional director a nih laia pension-a chhuak ta R Lalrodingi chu sawrkarin Tourism director atan a ruai nawn a, pension tawh rawih nawn chu MZP-in a duh loh sa reng a nih avangin hma an la a, chief minister hnena an thlennaah, sawrkarin a lo ennawn tur thu a sawi chungin, director atana rawih nawnna order awm tawh, an sut leh tak chu sawrkar hian a rawn ruai nawn leh ta a, chumi duh loh vanga hetianga hma la ta an ni tih an sawi.
An hmalakna kal zelah Tourism director atana sawrkarin a rawih nawn hi a bang emaw sawrkarin a rawih nawnna order hi a sut emaw a nih loh chuan Tourism directorate-a thawktute pisa kai tur hi dan chhunzawm zel an tum tih an sawi.
Thudawn danin, MZP hmalaknaa pisa kai tur dan hi Tourism thawktute lamah kai luih tum an awm loa, MZP lam an duty bakah police pawh an duty a, boruak duhawm lo thleng a awm lo. MZP hian tlai dar 4.00 ah pisa kai tur dan hi an titawp lailawk phawt a ni.
Rawih nawn duh loh vangin MZP-in Tourism staff office kai tur an dang
