Real hmahruai hun herchhuak ta nge nge!
Inrinniah si hnih faia mualneitu Villarreal hneh chungin Real Madrid chuan Spanish La Liga table-ah a ler an luah chho a, nizan inkhel result tarlan hman loh pakhatah an mikhual Real Oviedo an hneh chuan Barcelona-in an hmahruaina neikirin, Bernabeu club lakah hian point khatin an sang zui leh ang.
Estadio de la Ceramica chhunga inkhel entu mipui 20,432 lek chhuak khawm hmaah Kylian Mbappe chuan mikhual chakna goal hnih thunin, France striker hian league season kal laiah match 19 khelin goal 21 a khawl tling tawh a, fal zawkin top scorer intlansiakna kawngah hma a hruai.
Team pahnih hian first half-a half-chance nei zauh zauh chungin chawlhlawk hmain goal an khung zo lo ve ve ; second half tir lamah Mbbape chuan a goal hmasa zawk khungin, hun pekbelhah penalty atangin Villarreal goalkeeper Luiz Junior ven goal-ah chiang zawka Real chakna goal a thun zui leh ta a ni.
Vinicius Junior kha second half-ah hriam viau mah se goal lawm tur nei lo zawng bawkin a khawsa leh ta a, La Liga bikah a zawnin game 13 chhung goal a thun zo ta lo tling ta!
January thlaa La Liga an tan leh lai khan Real hian point li lain Barca an pha lo a, mahse, karhmasa hmasa leh mai khan Hansi Flick-a team hi Real Sociedad lakah an tlawm ringawt a, chu chuan La Liga title race-ah Xabi Alonso thlaktu boss thar Alvaro Arbeloa hoa inlan Real Madrid a tiphur a, point khat leka an phak loh Catalan-ho chu Inrinni zana an point thum hmuh chhuah hmangin an lehpel ta hial a ni.
Copa del Rey last-16 lamah 3-2-in second-division side Albacete hneh lo ringawt mah se a hnua Arbeloa hoa inelna hrang hranga an inlan hnuhnung vawi thumah Los Blancos an chak fai ta vek a, point 51 hum chungin pahnihnaa chhuk Barcelona lakah point hnihin an sang!
Real hmahruai hun herchhuak ta nge nge!
