Real laka zawp ral chungin Manchester City an tla!

Real laka zawp ral chungin Manchester City an tla!
First leg-ah 3-2-in an chak lo tawh a, Santiago Bernabéu stadium-a Champions League play-off second leg-ah 3-1-a tlawm lehin Manchester City chuan khelh hnih inkhelh belhkhawmah 6-3 ngawtin Europe champion lai Real Madrid an ngam lo a, last 16 an lut zo ta lo.
Nilaini zan inkhelah Kylian Mbappe ‘hat-trick’ lutuk hmangin an kawtkaiah Spanish champion an pawr hle a; Premier League club hian hun pekbelh minute hnihna a kal mek laiin Nico Gonzalez-a goal lawm tur nei ve phauh mah se zangnadawmna goal, an thangtlawm lutuk tur hliah thentu mai a ni!
Spain leilunga ropui nghal vut vut lo France captain Mbappe a insiamrem tawh a, khelmual chhungah a ze diktak pholang tan leh tawhin, Nilaini zan inkhelah pawh minute li an khelh tlin hmain Raul Asencio ball pek chu goal hmahruai khungna’n a hmang er zawk a; darkar chanve khelh pelh hlekah Rodrygo chhawpsak atangin City Brazilian goal-veng Ederson Santana de Moraes-a dan zawh loh Real goal dang a khung zui leh.
City khan bench-a thu thei tawka fit Erling Haaland-a thei lo an tuar na hle a; an buaina belhchhah turin Mbappe goal hmahruai an chhuah hnu lawkah hliam avangin defender John Stones an chan leh a, 2012-13 season-a group stage an pelh zawh loh hnuah tun kha Champions League-a City tlak hma ber tum a ni lo thei ta lo a ni!
Darkar khat an khel tling awrh tihah France forward Mbappe bawkin he inkhela a goal thumna khung lehin, he goal hi Federico Santiago Valverde Dipetta siamsak a ni.
Tarlan tak angin, mipui 77,023 hmaa reigning Premier League champion goal neihchhun kha Nico Gonzalez-a thun niin, Etihad club a zawm hnua a goal hmasaber a ni nghe nghe.
Real Madrid hian zanin last 16 draw-ah Bayer Leverkusen emaw La Liga lama an elpui lian Atletico Madrid emaw an hmachhawn thei dawn a, kumin hian an title kawl lai an humhim thei a nih chuan an record kawl lai pawtseiin European cup tum 16 hawn thei awmchhun an ni ang.
PSV 3-1 Juventus
Nilaini zan inkhel dangah Italy rama 2-1-a tlawm PSV Eindhoven chuan an kawtkaiah hnehna lian sualchhuakin khel hnih belhkhawmah 4-3-in Juventus an paltlang a, Champions League last 16 an lut ta zawk a ni.
Philips Stadion-a inkhel minute 90 chhungin score chu 2-1-a a ni a, heti chinah hi chuan first leg nen enin tlang tur zawk an la awm thei lo a, extra time khelh an ngai a, tah chuan Dutch team hian an mamawh goal khat dang hlawhchhuak lehin, nui hnuhnung zawkah an tang!
A hmuna inkhel entu fans 35,000 zet pungkhawm hmaah goal thun mamawh PSV tan Ivan Perisic chuan second half tir lam minute 53-ah Noa Lang siamsak atangin mualneitu team hmahruaina goal khung bawk mah se minute 10 a liam leh tihah Timothy Weah chuan Juve siphurh a sut a; Ismael Saibari chuan minute 74-ah Luuk de Jong siamsak atangin Dutch team tan a khungbelh a, hun pangngai tawp thlengin goal dang a luhbelh lo.
Extra time tir lamah Ryan Flamingo chuan PSV Eindhoven tlangna goal pawimawh thawh ve lehin, zanin last 16 draw-ah PSV hian Arsenal elawh Inter Milan emaw an tum thei dawn.
Uefa Champions League knockout round play-off second leg inkhel dangah Paris St Germain chuan 7-0 tehrengin an mikhual French club ve bawk Brest an sawp a, first leg-a sithum faia an chak tawh nen khelh hnih belhkhawmah PSG hi 10-0-in an chak a, chiang mangkhengin last 16 an lut!
Parc des Princes-a mualneitu team goal sarih lut hi mihrang thiau thun niin, first half-a Bradley Barcola leh Khvicha Kvaratskhelia-te goal hmangin Ligue 1 giants-in sihnih faiin hma an hruai phawt.
Second half-ah PSG tan Vitinha, Desire Doue, Nuno Mendes, Goncalo Ramos leh Senny Mayulu-te’n goal khat diat diat an thawhkhawm ve leh a, Parc des Princes-a mipui 47,211 pungkhawmte pawh khan a tawp lamah chuan goal pawh kha an lawm tha peih tawh lo emaw ni chu tih mai tur a ni!
Signal Iduna Park lamah thung erawh minute 90 chhungin goal a lut lo a, goal awm loa Borussia Dortmund leh an mikhual Sporting CP an inhnehtawk hnuah nikum runners-up Dortmund-in first leg result (3-0) hmangin last 16 an lut a, Aston Villa leh Lille-te chu an tum theih tur pahnih an ni.