La Liga title an beisei mekna kawngah rim taka thawkin Inrinni zan khan league hmahruaitu Spanish giants chuan Mallorca khelmualah point thum an hlawhchhuak leh hram a, inkhel dangah an hnuai chiaha title beisei ve mek Barcelona an chak ve bawk avangin Spanish top flight-a a sang pahnih inthlauhna hi khelh 31 ve veah point riat a ni chhunzawm zel.
Real Madrid chakna goal awmchhun hi first half tir lam minute 48-a midfielder Aurelien Tchouameni long-range goal chhuihluh niin, season kal laia a La Liga goal thum thunna chiah a ni.
Real hian Nilaini Champions League quarter-final second leg-ah Manchester City an hmachhawn dawn a, kartawp Pathianni zan El Clasico-ah an hmelma lian ber leh title race kal meka an elpui hnaivaiber ni bawk Barcelona an su zui leh dawn a, tunkar chhung chu team inthlahdah a rem lo hle tura ngaih a ni.
Karlaihawla Etihad an luh tur ngaihtuahnaa dah tel chungin Real boss Carlo Ancelotti chuan player thenkhat tan hahchawlhna hun a siamsak a, player a siksawi kualna lamah Bernanbeu first leg-a 3-3 draw an sualchhuah theih hram tuma luh hmasak chang Dani Carvajal, Eduardo Camavinga, Toni Kroos leh Vinicius Junior-te kha Mallorca mualah substitute bench a luahtir.
A hma chiah chawlhkarin Mallorca kha Copa del Rey final-ah Athletic Bilbao ngam loin an tlawm a, chu chuan La Liga lama chak duhna sang zawk pein, Inrinni zanah Los Blancos tan game an tiharsa hle reng a ni!
Mallorca game-ah England midfielder Jude Bellingham chuan Real tan minute 64 thleng khelin an lachhuak zui a; hun tawp lamah mualneitu team tlawm hrehin mikhual team an nawr na hle a, La Liga hmahruaitu team tan pawh hahdama khelhna hun a awm lo!
Real Madrid an kal zel
