An league bultanna inkhela chak tawh Real Madrid chuan Inrinni zanah si phur hmasa chungin mualneitu Almeria an hneh leh a, season thara game hnih an khelh tawhah an la chak ve ve.
He inkhelah hian minute thumna lekah Sergio Arribas chuan mualneitu team hma-hruaina goal tauhlutin, minute 19-ah Jude Bellingham chuan Toni Kroos siamsak atangin Real siphurh a sut a, second half tir lam minute 60-ah kum 20 mi lek Bellingham bawk hian mikhual hmahruailetna goal thawh lehin, England midfielder hian kumin nipui laia Borussia Dortmund chhuahsana Bernabeu club a zawm hnua a league game hmasa pahnihah goal thum a khawl tling ta der a, kum 2007-a hming chher Wesley Sneijder hnu lama Real Madrid tana league game khelh hmasak pahniha La Liga goal thum thun thei hmasaber a ni.
Bellingham manah hian Real chuan sum hmahruai pound makta-duai 88.5 an thehchhuak phawt a, a khelh tam dan leh khelh that dan azira a man hi la pung leh thei tur a nihna zawna a game hmasa pahnih ziarang enin Spanish giants hian English player manah pound maktaduai 115 an seng tling thei mai dawnin a ngaih theih nghal ruak!
Almeria laka Real goal thumnaah pawh Bellingham inrawlh lehin, Brazil forward Vinicius Junior-a goal tur a siamsak.
Birmingham City player hlui hian Spanish capital-ah hming a chher nghal a, Real boss Carlo Ancelotti pawhin German Bundesliga a chhuahsan hnuah Englishman chu La Liga lama insiamremna hun mamawh lo a nih thu leh an khelh dan style man nghal vat a nih thu a sawi.
Athletic Bilbao laka a league debut-ah goal khungin, season thara Real game hnihnaah pawh Bellingham chuan khelhna hmun chang satliah mai loin goal hnih a tilut zui leh zat a, Andalusia lama hnehna nuamsa an sualchhuah-na kawnga player lang-sar ber niin, Ancelotti team-ah mihuai kalbo ta te hnungzuitu ni tura beisei a ni!
Real icon Zinedine Zidane-a hak thin number five shirt an rochuntir a, Santiago Bernabeu-ah hiang engtiang taka pawimawh nge a rawn nih chhoh dawn kan thlir ang.
Real Madrid chak vawihnihna
