Inrinnia Nou Camp thuamthat chhung luh vawi khatnaa Athletic Club laka 4-0 hnehna an sualchhuah hmangin Barcelona chuan Spanish La Liga table-ah goal difference hmangin hmahruaitu Real Madrid lehpel zuai mah se Pathianni zanah Bernabeu club hian Elche muala 2-2 draw hrinchhuah point khat hmangin Catalan team lakah an hmahruaina an neikir leh nghal.
Table-a 11-na luahtu Elche lam hian second half tir lamah goal hmahruai thunin, minute 53-a Aleix Febas-a goal tihluh kha mikhual team-in minute 78-ah Dean Huijsen-a goal hmangin an sut thei hram.
1-1 a nih hnu minute 84-ah mualneitu Elche bawkin an hmahruai nawnna goal hlawhchhuak lehin, Alvaro Rodriguez-a goal hi Real-in an tlawmpui thei mai ang em tih ngaihtuahna a kal thui hma minute 87-ah Jude Bellingham chuan mikhual siphurh a rawn sut ve leh.
Goal dang luhbelh loin Spanish giants-in an mikhualna hmun atangin point khat an hlawhchhuak thei hram a, La Liga table-a an hmahruaina an changkir zui leh ta bawk.
Bellingham khan goal khat a thun bakah Bournemouth defender hlui Huijsen-a goal tur siamsak bawkin, La Liga season thara match li a khelh tawh atangin goal thum a tilut tling ta der a; Pathiannia England midfielder goal khat tihluh siamsaktu kha Kylian Mbappe a ni.
Manuel Martinez Valero stadium-a mipui 31,024 lek pungkhawm hmaah Xabi Alonso team kha tum hnih ngawt si phurtu zawkah an tang a; table laihawl luahtu Elche-in Real goalkeeper Thibaut Courtois an chhaihbuai hneh viau!
Madrid hian naktuk, Nilaini zan Champions League match pakhatah Olympiacos an luhkhung zui leh ang.
Real Madrid-in hma an hruaikir leh nghal
