World Cup 2026 khelh mekah June ni 18, Ningani zing khan round 1 khelh zawh a ni a, ram 48 ten vawi khat theuh an khel chhuak. WC 26 round 1 thil thleng langsar zualte:
1. Goal 75 : World Cup 2026 round 1-ah match 24 khelh zawh ni tawhin goal 75 a lut tawh a. Match khatah goal 3.13 lut ziah ang a ni. Player hrang hrang 50 zetin goal an thun tawh a, goal thun hnem ber (top scorer) ni mek chu goal 3 thun tawh Lionel Messi a ni. Player 50 in goal an thun tawh laiin player 49 zetin assist an nei ve tawh bawk.
2. Entu mipui : World Cup 2026 hi a hmunah mi 1,572,584 zetin an en tawh a, match khatah entu mipui 65,524 awm ziah ang a ni. New Jersey Stadium-a France leh Senegal inkhel kha a hmunah mi 80,545 in an en a, WC 26 ah entu tam ber an ni.
3. Card : World Cup 2026-ah mi pathumin red card an hmu tawh. Red card pathumna hi match hmasa ber Mexico leh South Africa te inkhelh tuma thleng vek a ni a, a hnu lamah Red card hmu an la awm belh lo. World Cup 2018 leh 2022-ahte khan World Cup chhungin Red card vawi 4 chauh phawrh a ni. Hetihlai hian mi 53 zetin Yellow Card an hmu tawh bawk.
Fair play teh nan Red card leh Yellow card hi hman a ni a, point hmuh tam aia point hmuh tlem tangkaina a ni. Direct Red card in point 5, Yellow Card in point 1 zel an hmu. Card hmuh tam leh tlem hi knock-out stage luh leh loh hril thei, nghawn thui tak nei a ni.
Knock-out round lut tura tehna pawimawh ber chu point a ni a, point hmuh inzat an awmin goal difference en hmasak tur a ni a, goal difference-ah an la inang a nih chuan goal thun tam zawk dinchan tur a ni a. An goal thun zat a la inang fo a nih chuan fair play point (Red card & Yello Card) a teh tur an ni ve leh.
4. Record : Kum 38 leh ni 357 a upa Lionel Messi chuan Algeria lakah hattrick a siam a. Cristiano Ronaldo record (33y-130d) record khumin World Cup a hattrick siam thei upa ber a ni.
Messi hi a elpui Ronaldo nen World Cup vawi khel thei awn ni dun mek bawk a. Mexico si nghak Guillermo Ochoa a inlan a nih chuan Messi leh Ronaldo te huangah hian a rawn awm ve leh bawk ang.
Portugal player ropui Cristiano Ronaldo hian kum 41 leh ni 132 a upa ni chungin DR Congo a hmachhawn a, goalkeeper ni lo player pangngai (Outfield player) zingah World Cup khel thei upa ber a ni. Egypt si nghak Essam El Hadary chuan kum 45 mi ni chungin World Cup a khel a, World Cup khel thei upa ber ani mek thung.
Record buah Messi leh Ronaldo
