Record siamin Nashville Songwriters Hall of Fame-ah Taylor Swift an la lut ta
Taylor Swift chu Nashville Songwriters Hall of Fame-ah an rama Thawhlehni kalta, August ni 11 khan an la lut ta a, country music hmanga bul tan, 2006-a ama hming chawia a album hmasa ber tichhuak Taylor Swift hi contemporary songwriter/artists category-ah lak luh a ni a, Class of 2026-ah a tel ta a ni. Taylor Swift hi Nashville Songwriters Hall of Fame-a lak luh ni thei zinga naupang ber a la ni.
He hall of fame a lak luh ni tur hi an kutchhuak te zawrh suma an chantir hmasak ber atanga kum 20 tal a liam phawt a ngai a, Taylor Swift hian a hlaphuah hmasak ber ‘Tim McGraw’ chu aman sain, June ni 19, 2006 khan a tichhuak a, he hla hi a album hmasa ber ‘Taylor Swift’ (October 2006-a tlangzarh) atanga a lead single a ni. A hla hmasa ber zawrh suma a chantir atangin kum 20 a tling chiah a, he hla hi kum 16 mi a nih laia a phuah a ni a, December ni 13, 1989 a piang, Taylor Swift hi kum 36 a tlin chuan Nashville Songwriters Hall of Fame-ah an la lut ta der mai a ni.
Taylor Swift chuan, “Naupan laia hla ka phuah ve tan atang tawhin Nashville hi intuaihriam nana tha ber niin a ka ngai nghal a. A tha leh thiam ber te hnen atanga inzir a, thawnthu thiam taka mite ngaihthlak tura phuah thiam te hnen atanga inzir ka duh a, lawmawm takin Nashville chu ka duhthusam ang chiah a lo ni,” a ti.
Taylor Swift, kum 36, hi he hall of fame-a lak luh ni thei naupang ber niin, lak luh theih a nihna hmasa berah an la lut ta nghal a ni. Swift hian Billboard Hot Country Songs chart-a lang thei hla 108 a nei tawh a, chung zinga 37 chu top 10-ah langin, a hla 10 chu No.1 an kai thei nghe nghe a ni.
Nashivlle Songweiters Hall of Fame nominee-te hi July thla khan an puang a, contemporary songwriters/artists category-ah hian Miranda Lambert, Chris Stapleton leh Phil Vassar te pawh an nomination-ah an lang a, mahse, Taylor Swift chiah hi hall of fame-a lak luh tura thlan a ni. Hall of fame-a lak luh tur hi artists, professional songwriters leh Hall of Fame member ten an thlang thin a ni.
Class of 2026, Nashiville Songwriters Hall of Fame-a lak luh tur zingah hian Grammy pali dawng, Billboard 200 chart-a lang thei album 13 nei tawh Lyle Lovett leh Billboard Hot 100-a 1962-a “Hey! Baby” tih hla No.1 lo kaipui tawh Bruce Channel te chu veteran songwriter/artist category atangin lak luh an ni dawn a, Shawn Camp leh Lee Thomas Miller te chu contemporary songwriter category-ah lak luh an ni bawk.
Kumin Hall of Fame inductee te pual hian 56th Anniversary of the Nashville Songwriters Hall of Fame Gala-ah hun an la hmang dawn a, he gala hi sawmbik te tan chauha tel theih niin, a hun tur hi an la puang lo.
Record siamin Nashville Songwriters Hall of Fame-ah Taylor Swift an la lut ta
