Red Bull Tlang Ruam
Urban Downhill Race
Inrinni khan khawpui chhung chhukchhoa cycle intlansiak (urban downhill MTB event) lian leh rothap Red Bull Tlang Ruam Urban Downhill 2024 an tih chu Aizawlah hlawhtling taka zawh fel niin, ram hrang hrang panga atanga MTB rider 22 rawn chhuakkhawm zingah Taiwan mi Chiang Sheng Shan (Dan) chu pakhatna a ni.
He urban downhill MTB race hi India mai ni lo Asia khawmualpuia a vawikhatna niin, energy drink siamtu company lian Red Bull leh organising team hi tlankawng awmna veng Upper Republic, Republic leh Republic Vengthlang Local Council bakah Mizoram sawrkar chuan tha takin a lo dawngsawng a, khawvel hriata Mizoram pholangtu pakhat a ni.
Red Bull Tlang Ruam 2024-a pakhatna Chiang-a hian zubui haw lam ang vang vanga chhuk tlankawng zawh zo tur hian minute khat leh second 41.640 a hmang a; amah hnaihbertu chu Indonesian Rama Teguh Adi Pratama (1:46.867) niin, lawmman semna dawhsan hniamber luaha pathumna hauhtu chu Indin rider Yawar Ali Khan (1:48.520) a ni.
India rama urban downhill MTB race hmasaber hian international mountain biking pawh India-ah a hnukhnai ngei dawn niin inelna buatsaihtu Red Bull chuan thuchhuah siamin an tarlang a, India rama downhill MTB ngainatu an pun chhoh zel thu an sawi bawk.
India, Bhutan, Nepal, Indonesia leh Taiwan atanga MTB rider pungkhawm zinga pakhatna dinhmun luahtu Dan-a khan khawvel huapa urban downhill MTB event lian Red Bull Cerro Abajo an tihah inelna a hmachhawn zui dawn a ni.
Chiang Sheng Shan hi tum li ngawt Asian Downhill Festival champion ni tawhin, national champion phei chu vawi 15 zet a ni tawh a, Aizawl mipuiin mit ngeiin tlenkawng chep leh chhuk bit thla vawn vawnah tunge a nih chiah an hmu ve ta a ni!
Red Bull Tlang Ruam winner’s trophy a lak hnuah Chiang Sheng Shan chuan Aizawla intlansiak boruak chu pui a tih thu sawi chungin inelna buatsaihtu Red Bull chungah lawmthu a sawi.
Aizawlah hian Red Bull athlete pahnih Tomas Slavik (Czech Republic) leh Pedro Burns (Chile)-te chu rider-te kaihruai turin an tel ve a, intlansiak tawp niah Slavík leh Burns hian tlankawng zawh vein, an MTB skill ropui chungchuang kha Aizawl mipui hmuhah an lantir bawk.
Vawiruk ngawt Cerro Abajo champion ni tawh Tomas Slavik hian nikum khan Aizawla tlankawng ‘design’ rawn enpui turin India a lo lut tawh a; India leilunga urban downhill MTB race hmasaber zawh a nih hnuah beisei nei chungin kum khat kalta khan Aizawl a lo lut tih sawiin, “Tunah chuan kan mangphan leh duhthusamte khan kan tihlawhtling ta niin kan sawi thei ang,” a ti.
Kum 36 mi Czech MTB Pro hian Aizawla an lo dawnsawn dan chu ropui a tih thu leh he khawpui atang hian lian zawkin India ramah urban downhill MTB a alhchhuah ngei a beisei thu a tarlang tel a, participant a hmuhte atangin India ramah talent a hmuh th u a tarlang tel.
Red Bull Tlang Ruam 2024-ah hian Hyundai Motor India Limited (HMIL) chu Red Bull thawhpui (official partner) niin, kha event bik atan khan Hyundai CRETA thar chu ‘official vehicle’ a ni.
Mizoram sawrkar hnuaia tourism department leh Mizo Cycling Association lamin Red Bull hi an thawhpui bawk.
Race result:
1. Chiang Sheng Shan (Taiwan) – 1:41.640
2. Rama Teguh Adi Pratama (Indonesia) – 1:46.867
3. Yawar Ali Khan (India) – 1:48.520
4. Nirav Shrestha (Nepal) – 1:48.860
5. Naman Agarwal (India) – 1:50.020
6. Ismamul Howk (India) – 1:51.520
7. Meban Aiboklang Suaim (India) – 1:52.470
8. Apshai Griffith (India) – 1:54.730
9. Taitus Ch Marak (India) – 2:00.250
10. Abhijeet Gharad (India) – 2:01.553
11. Rohan Thapa (India) – 2:10.553
12. Willbornson Wahlang (India) – 2:15.710
13. Virendra Mali (India) – 2:17.137
14. Jitesh Thakur (India) – 2:52.117