Cheng nuai 680 hmanga Reiek Tourist Resort tihchangtlunna atana hna thawh a nih danah sum siamna hmanrua a awm ngei nia hria in ZPM Thalai chuan chhuichian sak turin Lok Ayukta hnenah complaint an thehlut.
ZPM Thalai Hqrs. in Lok Ayukta hnena an thlen danin, kum 2020 atanga 2022 chhung khan Reiek Tourist Resort tihchangtlunna atan hian Mizoram sawrkarin cheng nuai 680 chuang a ruahman a, heng zinga nuai 560 man hna chu DJ Consultancy Services, Peter Street Sikulpuikawn hnenah restricted tender hmanga pek niin, a bak chu departmental work leh PWD Project Division-I atanga thawh nuai 114.4 a awm tih a sawi.
DJ Consulatncy Service hna hmuh hi kum 2020 atanga thawh tan, thla 18 chhung, December 2021 ralhmaa zawh tur niin, hun tiam chhunga an zawh theih loh avangin an dil belh a, thla 13 pek belhin January 2023 a zawh tura tih a ni a. Work component 12-ah thenin, sanction amount leh hnathawh hrang hrang a inmil lo hle ah a ngai tih an sawi.
RTI chhanna leh a hmuna an endikna atanga sum ruahman leh hnathawh dan inmil lo lutuk nia an hmuh chu an ngai thutak a, case-a ziahluh sak turin Lok Ayukta chairman ngenin, ‘spot verification’ nei a, he thila eirukna awm ngei nia lang chu chhuizui sak turin an ngen tih ZPM Thalai hian an sawi.
ZPM Thalai thuchhuak chuan kum 2020 atanga 2022, kum hnih chhung leka Reiek Tourist Resort atana nuai 680 chuang sen a ni chung pawh a, hmasawnna thil thar hmuh tur a la awm fumfe lo leh sum ruahman pawh mahni hlawkna atan leh mahni worker-te sum siamna atan maia hman nia a lang chu pawi a tih thu a sawi a. He thilah hian Tourism minister Robert Romawia Royte chu insawifiah turin a phut tih a sawi a ni.
ZPM Thalai sawi chu:
# DJ Consulatncy Service thawh, main gate siamna atan cheng nuai 53.07 leh parking area siamna atan nuai 148.70 dah leh an hnathawh chu thil awm lo lutuk leh sum siamna dik takah an ngai.
# Parking area pavement chu iron rod tel loa chhun a ni a. Parking area panna kawng siamna nuai 18.94 leh Amphitheather thawmthat leh cheinana nuai 95.61 senna phei chu a awmna an hmu zo lo.
# DJ Consultancy hhnathawh hi total estimate amount nuai 560 a nih laiin, RTI chhannaah chuan sum hmanna hi nuai 447.22 niin, nuai 82.78 hmanna tarlan a ni lo.
# Departmental work nuai 81.68 man, cottage 3, in pakhata room pahnih zel awmna, cottage pakhata nuai 10.56 theuh senna bakah cottage 2 thawmthatna’na nuai 7.99 ve ve dah pawh sum ruahman leh hmanna a inmil lo an ti.
# Cottage dang – Deluxe 1 atana nuai 4.90 leh deluxe II atan nuai 13.05 ruahman pawh an hnathawh leh sum ruahman a inmil lo hle an ti.
# Convention Hall thawmthat leh cheina atan nuai 16.08 dah atangin ceilling pawp hmun hniha bel bakah bathroom partition chu duraturf feet 4 square tling fumfe lo tur hmun hnih vel chauha pin leh rawng hnawih that bak hnathawh belh hmuh tur a awm lo an ti.
# PWD Project Division-I thawh tura ‘Repair and Renovation of Reiek Tourist Lodge & Zokhua’ nuai 32.48 dah atangin cottage 4 thawmthat leh cheina atan cottage tinah nuai 3.2, a vaiin nuai 12.8 chu enga tana hman nge an hre lo.
# Zokhua cheithatna atana nuai cheng 10 chuang dah ni siin, hnathawh mumal hmuh tur awm lo an tih bakah cafeteria atan nuai 2.65 ruahman leh Rest Hut Roof siamna atana nuai hnih dawn senna chu thil awm lo niin an hria.
Reiek Tourist Resort atana sum hman chhui turin Lokayukta pun
