Bairabi lam atanga Food Corporation of India-in Mizoram buhfai tur a lakluh thin chu Assam state huamchhunga rel kawng chhia avangin thla hnih chuang buhfai lakluh theih a ni tawh lo a, siamthat thuai a nih theihnana sawrkarin a bawhzui reng hnuah Ningani atang khan bufai lakluh theihin rel kawng hi siamthat a ni tawh.
Thudawn danin, FCI-in buhfai lakluhna atana a hman ber, rel hmanga Bairabi thlenga a lakluh thin chu kumin August 15 khan Assam Hailankandi district-a Jamira-ah tuilianin rel kawng a tichhia a, rel hmanga buhfai lakluh thin hi a khaihlak ta a ni. Bairabi-a FCI-in rel hmanga buhfai a lakluh hi rel kawng chhiat hma chiah, August 14 kha a thlen hnuhnun ber a ni a; thla hnih leh ni hnih leh a chanve dawn, rel kawng chhia hian buhfai lo lut tur a khaihlak phah.
Hei vang hian Mizorama ration (PDS) buhfai supply pawh stock neihsa leh FCI kudam-a stock awmsa atanga semrual a ni.
Rel kawng chhiat thu hi chief minister Lalduhoma’n a hriat veleh central-a Railways hotu liante be nghalin, rel kawng chhia hi rang taka siamtha tur leh a hma thei ang bera buhfai a lo luh leh theihnan hma la turin a ngen a. Food Civil Supplies minister B Lalchhanzova pawhin September 27 khan rel kawng chhiatna hmun Jamira-ah kalin, Railways hotute nen an inbia a; a rang thei ang bera rel kawng hi siamthata hman theih thuai a duh tih a sawipui a ni.
Hemi hnu hian Railways hotu lian, Maligoan Guwahati amite pawh minister hian kalchilhin, Mizoram-in buhfai quota sem tur chatlak loa rela an lo thlen tir ran a ngai tih a sawipui a. Railways hotute hian minister-in rel kawng chhiatna hmuna a kalchilh leh a ngenna chu zahawm tiin, chhunzan zawma a siamthat hna an thawh tur thu hrilhin, October thla tawpa zawh hman an tum thu an lo hrilh.
Hetianga hma lak a nih hnu ah October 31 khan buhfai hi rel wagon 29 (quintal 18560) chu Bairabi ah a lo thleng thei ta a ni.
Rel kawng chhia siamthat hnuah buhfai lalut leh tan
