Rel kawng hawnah BJP lawm
BJP Mizoram chuan Prime minister Narendra Modi-a’n Mizoram chhung ngeia rel kawng a rawn hawng chu lawmawm a tih thu a sawi.
BJP Mizoram thuchhuak chuan, khua a that loh avanga Prime minister-in Aizawl Lammual atanga rel kawng a hawng thei ta lo chu pawi a tih rualin, Lengpui Airport atanga harsatna awm loa inbiak hmuh theihna kaltlanga rel kawng hawnna hun tha tak a hmang thei erawh lawmawm an ti hle tih a sawi. Hei baka hmasawnna hnathawh mek leh hnathawh tur cheng vaibelchhe 9000 aia tam man lai Mizoram hmasawnna atana a hawng thei bawk chu lawmawm an ti hle tih a sawi a ni.
‘Mizoramah PM Modi kaihhruaina hnuaiah central hmalaknaa hmasawnna hnathawh ropui tak tak kan hmuh, Look East mai ni tawh lo, Act East Policy kaltlanga hma min laksak hi a lawmawm em em a. Central-a Pu Modi kaihhruai a sawrkar chhunga development kan hmuh hi a ropui hle. Hengte avang hian Mizoram mipui pawh kan lawmin kan ring a, Pathian hnam thlan kan nih anga development hmuh hi kan phu a, chuvangin Mizoram mipui pawhin hmasawnna tha tak kan neih mek piahlama hmasawn lehzual tura kan inbuatsaih a, a dawhthleng lam kan insiam rem thiam phei chuan development hi kan beisei aia tha kan hmuh zel kan beisei,’ a ti.
Prime minister Narendra Modi, Union Railway minister Ashwini Vaishnaw, Mizoram larsap Gen. VK Singh, chief minister Lalduhoma leh sawrkar hruaitu dangte, venhim hna thawktute leh Mizoram mipui pawh Mizoram tana ni chhinchhiahtlak tak hmang tura khaw chhe tak hnuaia Lammuala thutna lenglo khawp kalkhawm an awm chu a lawmawm tih sawiin, hetiang ni pawimawh leh hlu tak, hriatrengna inkhawma tel zawng zawng fakawma an tih thu a sawi bawk.
Rel kawng hawnah BJP lawm
