Reliance Foundation-in Formosa Foundation India kaltlanga Central YMA hnena ambulance an hlan chu Thawhlehni khan a dawngtu turte hnenah sem a ni.
Ambulance – Mahindra Ambulance (Bolero Neo) hi Central YMA chuan Chalfilh Group YMA hnenah a lo hlan tawh a. Thawhlehni hian Aibawk-ah Chhimphei Group YMA leh Hmuifangtlang Group YMA kutah a hlan a; Lunglei-ah Sub-Hqrs. YMA Lunglei kaihhruaiin Zobawk Group YMA, Pangzawl Group YMA leh Chawngte Group YMA hnena a hlan bakah MTP Sub-Hqrs Tipa ‘V’ leh YLA Sub-Hqrs Sangau hnenah an hlan bawk.
Central YMA president R Lalngheta chuan, tanpui ngaite tanpuina atan leh ruihhlo do kawnga hmanraw tangkai tak tur Reliance Foundation-in Formosa Foundation kaltlanga a pe thin chu lawmawm a tih thu a sawi a. Mi thenkhatin YMA chu lei theih ang hialin chhuah thin mah se, lei theih an ni lo tih hriat tlan a tul tih a sawi.
Formosa Foundation chungchanga chirhtheh awm thin chu an tum an hriatchian thu sawiin, an hmalaknaah YMA chu an bulah a din tlat tur thu a sawi a. Mizoram zimtea hnam bil anga inthendarh chu YMA chuan a remti lo tih lantirna atan he ambulance semnaah hian Young Lai Association leh Mara Thalai Pawl pawh huang khatah an awm vek tih a sawi bawk.
Formosa Foundation India chairman Jonathan Lalremruata chuan, Formosa chu Covid-19 hrilen laia din a ni a, NGO an ni a, YMA behchhana hma la thin an ni tih a sawi. “Kan partner company-te nen Mizorama kan luanchhuahnaah hian Mizo mipui mit timim zawnga ke pen kan tum ngai loa; phut let leh beisei let nei loin, CSR (corporate social responsibility) hmanga hma la kan ni. Ram leh hnam tan a tul ang zela luanchhuah kan tum a ni,” a ti.
Central YMA finance secretary MS Ralte chuan, Reliance Foundation kaltlang hian ruihhlo dona atana hman tur Mahindra Bolero Campers 9 an dawng tawh a. Sawrkar laipui pawhin lirthei dang 9 chu YMA hlan turin hma a la mek tih a sawi.
Reliance Foundation pek ambulance sem
