Tun tum Remna Ni June ni 30 chu Pathianni-ah a tlak avangin Remna Ni lawmna hman hun a inang lo zung a. A thenin June ni 30 hma lamah an hmang a, a thenin June ni 30 hnu lamah an hmang ve thung a. Remna Ni lawmna hun hmang e ti lo chuan, kan thusawi duh dan a rualrem lovin a inrem fuh chiah lo deuh niin a lang a. Remna Ni lawmna hian Inremlohna lam a awn deuh tui ni te hian a ngaih theih rum rum ta mai.
Kha Remna leh Muanna a lo thlen theih chhan kha, MNF hruaitu lawk zual emaw, Congress hruaitu lawk zual emaw, Kohhran hruaitu lawk emaw, MZP, YMA, MUP, emaw, mimal mi pawimawh tute emaw hmalakna bik avanga lo awm a ni lova, a khaikhawm nan Zoram mipuite tanrualna rah a ni, kan ti thei ang. Mi thahnemngai fal deuh leh a thawk palai hah zual deuh bik chu an awm ngei ang; chu pawh chu mipui tanrualna leh nawrna leh duhna tel lova tih theih leh thawh theih pawh a ni lo.
Remna a thlen theihna tura thawh hlawk deuhte chu an awm lo thei lo a, chung mite chu hminghmerha han tarlan te pawh tihawm tak a ni zel ang; mahse, remna leh muanna thlentirtu ang hrima ngaih theih tura dah chungnun tumna ang hi chu inremna kara inremlohna chawkchhuaktu a ni thei a, chutiang lam hawi chuan kan kal chho tan ta mai emaw tihturin ‘thu inchhang’ deuh hi a awm leh thin. Hei hi kan mausam a, kan kalsan a, remna ni lawmnaah hian, ‘kei, kei,’ ti lova, ‘nang, nang’ emaw, ‘anni zawk’ emaw tia hmingthatna midang hlan duhna thinlung thianghlim, thlahtu bul pi leh puten nun dan ze mawi tak an lo neih thin kha, hruaitu lam hian a chhawm nun kawngah hma han hruai leh thei se, a ‘layman’ lam hi chuan kan zui leh thup thup thei ngeiin a rinawm. Chuti a nih loh a, a titu bik nihna kan hauh tùn reng a nih chuan, chhuan lo awm zel turte hian an rawn chhunzawm palh ang a, remna ni-ah an inbakkaih chawt chawt mai ang tih a hlauhawm hlel lo a ni.
Taksa peng hrang hrangteah hian pawimawh lo bik an awm lo ang hian, remna leh muanna a lo thlen theih chhanah hian, Zoram taksa peng tin in-fawk-khawm mipuite hi kan pawimawh vek a ni tihah hian inrem tlat ang u khai.
Remna Ni – Remlohna Ni?
![](https://theaizawlpost.org/wp-content/uploads/tap_logo-min-large.jpg)