Tunhnaia chief minister Lalduhoma’n Mizoram remna thuthlung ziah chungchang a sawi leh a kaihhnawih a sawi chu an ngai thutak hle a, an bawhzui dawn tih MNF hruaitu Tawnluia chuan a sawi.
Thawhtannia Mizo Hnam Run inkhawmah MNF National Core Committee member Tawnluia chuan, remna thuthlung chungchangah chief minister thusawi dan chu pawi an ti a. India sawrkar aiawhin Home secretary RD Pradhan leh Mizoram UT chief secretary Lalkhuma ten hming an ziahhnan a; an signature pawh hmuh theih vek a ni, tiin, “Kan CM-in MNF leh Central Home department inremna (accord) anga a sawi hi thudik lo a ni. He thil hi kan la serious riau a, remna kha Mizoram mipui siam a ni. India Constitution Article 371 (G) a thun turin inremna thuthlungah khan ziah a ni a, Constitution-ah sengluh niin, MNF chauh khan ziak ni ila engtin nge kan hman theih ang,” a ti.
Mipui leh remna thuthlung ziah kha chief minister hian a tibawrhbang nia sawiin, hemi chungchang hi August 4 hian MNF party hruaituten bawhzui turin an thukhawm dawn tih a sawi a ni.
ILP chungchangah remna thuthlunga ziah a nih angin, MNF chuan thlahdul an phal ngai dawn lo tih MNF hruaitu hian a sawi a. CM erawh chuan central sawrkar thuneihna a ni, tiin a tlanchhe nghal dui a, state sawrkar an rawn a ngaih dawn avangin an phal ngai dawn lo tih a sawi.
Forest (Conservation) Amendment Act chungchangah pawh chief minister chuan ‘dawi aw’ a chhuah fo tih sawiin, “Khawi phenah nge bihruk a tum. Kan sawrkar leh a nih chuan keini chuan kan thiat leh ang,” a ti. FCRA Bill chungchangah kohhran hruaitute leh sawrkar hotute an inhmu a, sawrkar hmalakna hmuh tur a awm lo tiin, Kristian sakhua sawinghingin a awm mek a, khawnge sawrkar a awm, tiin Tawnluia hian a zawt. MNF chuan ram leh hnam dinchhuahna atan politics an khel tih a sawi bawk.
Remna ziah chungchanga CM thusawi kha kan ngai thutak – Tawnluia
