Nilaini khan Aizawl District Football Association (ADFA) te buatsaih khua leh vengte inelna MBOCWWB 8th Inter Village / Local Council Football Tournament 2026 khelh chhunzawm niin, last 16 khelh tan a ni a. Inter Braanch YMA football tournament champion lai Republic chuan an khingpui Venghlui Local Council team chu 10-0 ngawtin an sawp a, nuamsa takin quarter-final an lut. Inkhel dangah Ramhlun South in Saikhamakawn an hneh a, quarter-final an lut ve bawk.
Champion tura rinkai ber zinga mi Republic hian an khingpui Venghlui an ngam hle a, chawlhlawk hmain goal li ngawt an thun hman. Republic tan hian F Lalrinpuia chuan inkhel tan atanga minute 12-na lekah hmahruaina goal a thun nghal. Hma takah goal an thun vangin an phur a, inrintawkna sang zawk nen an inlan zui theih phah. Hmahruaina goal an thun hnu lawkah K Lalhmangaihkima chuan an goal hnihna a thun a. Heemi hnu hian Laltluangliana leh H Lalfakzuala ten chawlhlawk hmain goal an thun belh zui leh a, 4-0 a hmaruai chungin chawlhlawk an hmang.
Chawlhlawk hnu lamah Republic an khel tha lehzual a, goal ruk ngawt an thun belh. Republic tan hian Joseph C Lalmuankima chuan goal thum thun belhin hattrick a siam a. Lalnunzira, Vanlalkrosschhuangzela Ralte leh Vanlalthanga ten goal khat theuh an thun belh bawk a. Venghlui lakah 10-0 ngawtin hnehna an chang zui ta a ni.
Nilaini a inkhel dangah Ramhlun South chuan hun tawp dawn hnaih minute 87-naa Vanlalrinchhana goal thun hmangin Saikhamakawn an hneh a, quarter-final an lut ve bawk.
Vawiinah last 16 khelh chhunzawm niin inkhel pahnih a awm leh ang a. Dar 11:00-ah Bethlehem Vengthlang leh Bawngkawn W’ an intum ang a. Dar 2:00-ah Salem Veng leh Kulikawn Local Council team an intum ve leh ang.
Republic an chak nuamsa
