Budget Session neih mekah sorkar department thenkhata restricted tender hmanga hna pek zat tarlan a ni a, department pakhatah ringawt pawh cheng vaibelchhe 1000 chuang man hna hrang hrang restricted tender hmanga pek a ni.Tuirial bialtu K Laldawngliana zawhna, ziaka chhan chi chhangin PWD minister Vanlalhlana’n 2023 December atanga 2025 December thlenga PWD hnuaia restricted tender hmanga hna pek zat a sawi a, hna 157 pek a nih thu House a hrilh.
PWD minister hian 2023 December atanga 2025 December thlenga restricted tender hmanga hna pekte hi work order amount nen a sawi a, hna hrang hrang 157 man belhkhawm hi Rs 10,67,98,54,293/- (cheng vaibelchhe 1067.98) a ni.
PWD hnuaia hna pek tarlanah hian work order la pek lo pahnih an awm a, Mizoram pawn address 15 a awm.
PWD minister chhanna hi February ni 25-a mi a ni a, hemi ni vek hian ziaka chhan chi zawhnaah department dang pahniha restricted tender hmanga hna pek zat a lang bawk.
Tuirial bialtu bawk hian agriculture & farmers’ welfare department hnuaia restricted tender hmanga 2023 December ni 8 atanga 2025 December thlenga hna pek zat a zawt a, minister PC Vanlalruata’n pahnih a awm thu, cheng nuai 300 man leh cheng nuai 270 man a nih thuin a chhang.
Tuirial bialtu bawk hian 2023 December ni 8 atanga 2025 December thlenga PHE department hnuaia restricted tender hmanga hna pek zat a zawt a, minister Prof Lalnilawma’n hna panga pek a nih thuin a chhang. PHE department-a restricted tender hmanga hna pek zawng zawng hi Rs 7,03,68,592 man a ni.
Restricted Tender hmangin hna cheng vaibelchhe 1000 chuang
