CM leh MKHC hruaituten tun hnaia Union Home Minister Amit Shah an hmuh thu leh, home minister-in an ngenna anga tunhma lam huap (retrospective) lo tura dan thar (FCRA Amendment Bill, 2026) chu siam a nih tur thu te, dan awmsa leh siam that rawt tharna te ziaka pek a lo tiam bakah, memorandum-a an thu thlente chu a chhanna ziaka pek a lo remtih thu te chu Mizoram sawrkar thuchhuahah hmuh a ni a. Hemi chungchang hi phai lam TV te pawhin “Amit Shah says law won’t be retrospective” tiin an puang dum dum bawk.
Mizoramin FCRA dodalna kawnga ke a pen meknaah, pen khatin hma a sawn hret a tih theih awm e. FCRA Amendment Bill, 2026 hi kumin March ni 25-a parliament-a pharh vek tawh, dodalna a nasat avanga House-a sawi ho la ni lo, tun monsoon session-a sawi ho tura ruahman niin August ni 12 hian sawi ho theih beisei a ni a. Bill chhung thu (Bill text) zinga thumal awmsa ‘retrospective’ chu sawi ho a nih hma hauh leh, ziah danglam a la nih hma hauhin a changtu ber home minister-in tawngkama ‘retrospective apply a ni lovang’ a tih hi thu tlinga pawm mai loh chu tih theih dang a awm vak rih lo niin a lang. He retrospective hi Mizoramin a helh ber pakhat kha a nih hmel a! Memorandum-a thu thlen point hrang hrangte chhanna erawh hriat a la ni lo a.
Amit Shah pawh hian he Bill hi Kristian-te dona a nih loh thu chu Catholic Bishops Conference of India (CBCI) hnenah a lo sawi tawh bawk a. India rama foreign donation lo lut zawng zawng atanga Kristian te hnena lut chu 15% atanga 30% vel chauh a nih thu leh, kum kaltaa foreign donation cheng vbch 17,000 lo lut atangin Kristian pawlte chan chu cheng vbch 3,000 (17.6%) vel chauh a nih thu a sawi a. Kohhran chunga hleilenna emaw beihna a awm chuan FIR thehlut tur leh, police-in an bawhzui duh loh chuan MHA lamah report turin a ti a. Dik lo taka FCRA cancel sak nia an hriat NGO list te pawh thehlut turin a lo ngen nghe nghe a ni.
Hetih lai hian, rilru kaptu lianpui la awm chu sakhuaa inleh/sakhaw thlak “Proselytisation” chungchang hi a ni. Kristian-te chuan tihluihna hmangin tu mah Kristian sakhua zawm turin an thlem ngai lo a, mahse kawng hrang hrang hmanga chanchin tha hrilh darh chu kristian sakhaw laimu ber a ni ve thung a, chu chu India Dan Pui ber pawhin a remti a, chuvanga India ram hi Secular State tih a ni.
Tuna sawrkarin “proselytisation” tih thumal a hman dan hi a fiah lo a, tih fiah a ngai tih chu tuna dan siam thar tur dodaltute ‘demand ber pakhat’ a ni. Eng chin hi nge proselytisation, eng chin hi nge rawngbawlna pangngai tih a chiang lo a, dan vawngtu tur police emaw officer ten an duh duh dana an hrilhfiah theih anga a awm avangin hei hi “a hlauhawm” tih a ni a. Hei hi India ram chhunga opposition party-te pawhin ‘Draconian Law’ an tihsak chhan ber pawh a nih a rinawm.
A khaikhawm nan chuan, “Retrospective a ni dawn lo” tihah hian lawm a la kim lo a, tuna tarlan takte leh, memorandum-a point hrang hrangte tihhlawhtlin a nih loh chuan he dan thar hman turah hian Mizoram chuan remtihna ban a phar pui ve thei dawn lo, tihna a ni a; chu chu chief minister pawhin a lo sawi tawh kha a ni.
‘Retrospective’ leh ‘Proselytisation’
