Land Revenue & Settlement department chu tunlai thiamna leh hmasawnna hmanga mipui tana dawr theih turin a insiamrem chho mek a. An thil kalpui dan hi Zirtawpni khan tichhinin minister B Lalchhanzova leh department hotute an tel.
North Eastern Council hnuaiah cheng vaibelchhe 6.48 project GIS (Geographic Information System) behchhan Comprehensive Land Record Management System chu LR&S department hian a hmang tawh dawn a. He software hian department hnathawh a digitise dawn bakah lehkha thehluh hrang hrangte online-a thehluh theih a nih tawh dawn a; application leh file pawh online-a tih a ni tawh dawn.
Hei hian lehkha leh file bo thin a ti bo dawn a, surveyor detailment leh file thlen chin mipuiin awlsam takin apps leh sms hmangin an en thei dawn tih LR&S minister hian a sawi. Department officer-te leh surveyor-te pawhin he software hmang hian ram am teh tawh chu an buaipui zui thei dawn a. Hotute leh mipui lamin an hnathawh chin an thlir zel thei tur chuan hna langtlang leh rintlak a thlen a beisei tih a sawi a ni.
Mipui lamin document thehluh kim loh emaw an dilnaa felhlel emaw a awm a nih chuan, system hian sms leh link hmangin a hriattir thei dawn a, hei hian ‘ease of doing business’ a chawisan bakah department chu mipui tan a hnukhnai dawn tih a sawi bawk.
Software hi siamthat ngai lai siamthat a nih hunah a hmangtu tur department-te training pek an ni anga, mipui lam pawh awareness pek an ni ang. Software hi Lailen Consulting Limited siam a ni.
Ainawn Veng chungchang pawh minister hian department hotute a sawipui a. Chief minister-in government complex ram chinfel chu a ngaipawimawh, tiin, a chinfel dan tur ruahmanna siam turin department hotute a hrilh a. An ruahmanna nen a rang lama hmalak dan tur sawiho leh tur a ni tih a sawi a ni.
Revenue department digitise-na enho
