Local Administration minister C Lalsawivunga chuan village council 88 hnenah computer set a pe.
LAD minister sawi danin, computer sem hi Rashtriya Gram Swaraj Abhiyan (RGSA) scheme hnuai ami, Ministry of Panchayati Raj kaltlanga dawn a ni a. Mizoram tana RSGA nodal department chu Local Administration Department a ni. RGSA scheme hian a tum ber chu, tualchhungah Sustainable Development Goals an tihhlawhtlin theihna tura VC-te thuamchak a ni a. Training chi hrang hrang hmanga VC-te hriatna leh thiamna tihhmasawn a, khawtlang rorelna leh inrelbawlna hmunpui an neihna atana Panchayat Bhawan (VC House) pek, tualchhung mipui tana tangkai leh awlsam zawka rawng an bawl theih nan computer leh Common Service Centre pek a ni.
Computer set tha tak an dawn chuan khawtlang rawng an bawlna kawngah information technology kaihhnawih thilah nasa takin a pui dawn tih minister hian sawiin, kawng hrang hranga VC mawhphurhna hlen kawngah pawh an hman tangkai a beisei tih a sawi.
LAD hotute sawi danin, RGSA hnuaiah hian nikumah khan computer set 261 semchhuah a ni tawh a. Kumina 88 an sem nen, a vaiin 349 an semchhuak tawh. Computer set hi Government e Marketplace (GeM) kaltlanga lei a ni a. RGSA scheme hian Mizorama VC zawng zawng, Autonomous District Council huamchhung amite pawh a huam tel vek a ni.
RGSA scheme atangin VC-te computer set pe
