Rigid pavement-a kawngpui
siam rawtna bawhzui dawn
Chief minister Lalduhoma’m Mizorama national highway ho cement concrete-a chhun (rigid pavement) vek a rawt chu bawhzui an tum dawn tih Union minister of state for Ministry of Road Transport Harsh Malhotra chuan a sawi.
Zirtawpnia MZU hmun Tanhrila 233rd Indian Road Congress Mid Term Council a hawnnaah chief minister hian Mizoram-in ruahtui a dawn tam avangin national highway chu rigid pavement-in siam ni se, a siamna man a sang deuh a nih pawhin, a tlo dawn avangin a enkawl zuina man a tlem dawn a, khuareiah senso a tlem zawk dawn tih a sawi.
International ramri thui tak nei kan nih avangin kan national highway chu strategic road-a puan nise, chak zawkin hna a thawh theih anga, ram tan a tangkai a ring tih a sawi bawk.
Mizorama national highway sial hna thawktuten leivung paihna (spoil banks) an hmang tha tawk lo tih chief minister hian sawiin, environment leh loneituten an tuar nasa a, tun hnuah chuan tha taka kalpui zel tawh turin a chah.
He intawhkhawma khualzahawm Union MoS for MoRTH chuan national highway ho rigid pavement ni tawh se, tia chief minister ngenna chu tihhlawhtlin an tum dawn tih a sawi a. Kawngpui tha neih chu ram ei leh bar hmasawnna nen a inzawm tlat tih sawiin, “Sawrkar laipuiin a ngaipawimawh a, hma a la nasain hmachhawp pawh a ngah hle,” a ti.
Mid Term Council puala Ningani zana thuthar thehdarhtute an kawmnaah Mizoram kawngpui a tlo loh thin thu leh rawtna an neih an thlen chu IRC president Prof. Manoranjan Parida chuan Central Road Research Institute atangin zirchiang tur team an lokal tur thu leh Council Meeting-ah hma lak zui dan tur rel a nih tur thu a sawi a ni.
Indian Road Congress hi India rama engineer zawng zawng, sawrkar, company leh mimal hnuaia thawk leh thawk lo pawh an tel vek theihna, highway engineering-a pawl lian ber a ni a. India rama kawng, lei leh tunnel engineering kalpui dan tur standard tinreng duangtu a ni. Kum 1934 a din a ni.
IRC Council-a CM thusawi dang:
8 Kawngpui siam thar ni si, chhe hma leh lutuk, fur khat pawh daih loa siam a ni thin hi tihbo a tul a, kawng kual tam lutuk a ngaimawhawm a, hmun tam tak chu sum sen belh lutuk loa ngil taka sial theih a nih a rinawm. Kawngpuiin kawrte a kanin kawrtea hume pipe dah thlak a, a chung leia hnawh a, kawngkamah hmunhma thar siam belh zel a tha hle.
8 Mizoram-in airport pakhat leh rel kawng pakhat chauh a la neih avangin kawngpui chu kan nitin chak lakna hnar a ni a. Kan road density chu 46.37 kms per 100sqkm, India ram kawngpui density chawhrual (national avarage) chu 116kms per 100sqkms a ni a, kan dinhmun a la hniam hle.
8 Kawngpui kan mamawh belhna a la san zia chu khawtin atang hian an lo leh huan panna kawngpui laihsak dilna a lo lut reng a. Thingtlang khaw mawngping kan tih ang chi, an khaw thenawmte nena inkalpawhna la mamawh kan ngah hle.
8 Hnathawktuten khaw kar kawng aiin khaw chhung kawng khawih hmasa zel se, mipuiin hmasawnna chhawr hma zel se a tha.
8 Sawrkar kum kal mekah Central Road Fund cheng vaibelchhe 300 tal central-in min pe thei se.
Rigid pavement-a kawngpui siam rawtna bawhzui dawn
