Rihna tihhniam duh chuan exercise lak that leh ei leh in lama fimkhur a ngai a, heimi pahnih hi a kal kawp loh chuan kan duh ang result neih a harsa thin. Tun tumah hian Times of India health section-in rihna tihhniam duh te tana fibre pai tam ei tur tha ni a an sawi te kan rawn tarlang e. Fibre hian mi a tipuar rei a, chuvangin rihna paih tumte tan fibre tamna chaw ei tam tur tih hi inzirtirna pawimawh tak a ni reng thin.
1. Dark chocolate leh balhla: Dark chocolate hi ama tawk pawhin superfood anga ngaih a ni sa tawh a, balhla nena ei pawlh phei chuan intihcher tumte tana chaw tha tak a ni.
2. Kawlthei: Kawlthei pum lian tha pangngai pumkhat ei emaw a juice in emaw hian kan nikhat fibre mamawh zat a phuhru thei deuhthaw anga chhut a ni. Chuvangin kawlthei hi intihcher tumte tana chaw tha a ni a, mi a tipuar reiin, hmawmsawm kan ei tur min veng.
3. Kiwi: Kiwi pum lian tha pangngai, pum hnih-ah hian kan nikhat fibre mamawh a awm angin an chhut. Kar li chhung nitin kiwi pum hnih ei ziah la, chu chuan i thisena thau tha lo awm tam tak a paihchhuak ang a, chu chu lung hriselna atan a tha hle a ni.
4. Pistachios: Pistachios hi a tui a, chutiang bawkin fibre pawh a pai hnem hle a, mi a tipuar rei thei bawk. Pistachios gram 30 velah hian fibre gram 2.8 leh protein gram 6 vel awm angin an chhut.
5. Serthlum: Serthlum hi thei tui tak a ni a, Vitamin C a pai tam hle a, chu chu vun taksa hriselna leh vun hriselna atan pawh a tha, hei bakah hian fibre a pai tam hle. Serthlum pum lian tha pangngai pum khatah fibre gram 3.1 vel awm angin an chhut.
6. Balhla: Balhla-ah hian potassium a tam a, BP siamthat nana chaw tha a ni, hetihrual hian balhla hi fibre kan hmuh theihna tha ber te zinga mi a ni bawk.
7. Broccoli: Broccoli hian fibre a pai hnem hle a, a hel a ei aiin chhim deuh phawlh a eiin a tha zawk. Broccoli no kha tah hian fibre gram 5 vel awm angin an chhut.
8. Theihmu: Theihmu (raspberries) hian fibre a pai hnem hle, theihmu no khatah hian fibre gram 3 vel awm angin an chhut.
9. Parbawr: Parbawr pum lian lutuk lo-ah hian fibre gram 12 vel awm angin an chhut. Parbawr rawt diak (mashed cauliflower) hi alu rawt diak nen a taste te pawh a inang lek lek a, rihna paih tumte tana chaw tha tak a ni.
10. Theibuhfai: Theibuhfai (pomegranate) mu no chanve-ah hian kan nikhat fibre mamawh a awm angin an chhut a, intihcher tumte tan chaw tha a ni.
Rihna tihhniam duh te tana ei tur fibre pai tam
