June 15, Thawhtan zan khan World Cup 2026-ah champion tura rinkai ber Spain chu World Cup-a hmel thar Republic of Capo Verde hmachhawnin an inlan a, mak tak maiin an chak zo lo. Spain laka tlawm pumpelh Capo Verde in ngaihven an hlawh thar hluai. Group H a inkhel dangah Saudi Arabia leh Uruguay an inhnehtawk ve bawk a, Group H a ngaihnawm zui hle.
Spain khuang benah Capo Verde an lam Spain hi European champion an ni a, player an neih that rual em vangin World Cup 2026-ah pawh champion tura rinkai niin ngaihven an hlawh hle. World Cup-a hmel thar, mipui pawh nuai nga chuang awrh chauh awmna Capo Verde lakah awlsam taka chak tura ngaih an ni a. Goal eng zat tak thung ang maw tih chu football ngaihventute zawhna a ni.
Coach Luis de la Fuente chuan hliam damkawr Lamine Yamal leh Nico Williams te a khel a, Capo Verde lakah bul a tantir lo. Spain hian an khel chhe lo viau a, ball chang chawtin an khingpuite an kat kual reng. African team in Spain hlauhawmzia an hria a, point hlawhchhuah hram beiseiin an goal an veng chawt. An khingpui ten an goal veng nasa viauin, khelmual chanve-ah inkhel chawt mah se La Roja in goal an thun thei mai lo. Goal thun theihna hun tha nei bawk mah se uiawm takin an hlah a, Capo Verde si nghak Vozinha an paltlang zo lo.
An hun tha neih an uiawm takin an hlah fo va, goal an thun har em vangin Lamine Yamal mamawhna a sang a, loh theih lohin luhtir a ni. Yamal luh hnuin Spain in nawr leh zual hret mah se Capo Verde tlarhnung an khawng tlat thung a, goal an chhuah duh lo. Spain coach Luis de le Fuente-a’n Dani Olmo, Mikel Merino leh Nico Williams te luhtir leh bawk mah se a che tlai hret a, danglamna lian an thlentir thei bik lo. Beisei phakbaka inkhel hmuhnawm chu a tawp a. Champion tura rinkai ber Spain in an sawp ngei tura ngaih Capo Verde lakah hnehna an chang zo lo.
De la Fuente tihsual chu
Spain coach Luis de la Fuente chuan tlarhmaah Mikel Oyarzabal leh Ferran Torres te a luhrual tir a, a sir leh lamah Gavi a luhtir bawk. Oyarzabal leh Torres te hian beisei an phak lova, an indip a ni deuh ber. Oyarzabal phei chuan minute 30 chhung ngawt ball a dek lo hial niin an chhinchhiah. Chuti chung chuan De la Fuente-a’n player a thlak danglam har hle tho thung.
Mamahna a san em vangin Lamine Yamal chu minute 71-naah a luhtir a, a tlai hret tawh vangin Yamal meuh pawhin danglamna lian a thlen thei lo. Minue 81-naah Dani Olmo a luhtir a, minute 87-naah Nico Williams a luhtir leh tho bawk. Yamal leh Williams te an lut hma lo a nih pawhin Olmo tal lut hma se kawng a kuak phah tura ngaih a ni. An hneh tura ngaih Capo Verde lamah De la Fuente hi an inthlahdah rei hlet niin a ngaih theih.
Spain hian World Cup-a an match hmasa berah chak an harsa thin ve reng a lo ni. World Cup an khelh tawh vawi 15-a an match hmasaberah vawi thum chauh an chak a, draw vawi nga neiin tlawm zawkah vawi 7 ngawt an tang.
Star thar Vozinha
Spain lakah 26% chauh ball chang chungin Capo Verde in tlawm an pumpelh a, point an hmuh theih nan si nghak Vozinha a thawhhlawk hle. Portugal rama second division club Chaves tana khel mek kum 40 mi Vozinha chuan pui zet zetin save vawi sarih ngawt a nei. Spain lakah goal eng zat tak chhuah ang maw? tih melha an melh kha inkhel a zawh meuh chuan star thar a ni a, an ram chhanhimtu niin ngaihven a hlawh thar nghal hluai.
Spain nen an inkhelh zawh hma thleng khan Vozinha hian Instagramm lamah zuitu 50000 awrh chauh a nei a. Spain nen an inkhelh tuma Man of the match a nih hnuin zuitu maktaduai 1.5 chuang zet a nei der tawh. Spain laka a chetha hi amah ngei pawh a lawm nang mai a, lawm vangin a mittui a tla hial a ni. Vozinha hian tanrual chu an ralthuam a nih thu leh an ram tan an theihna sang ber an hlan thu a sawi.
Spain laka point hmu tur khawpa team din a, team tha leh khawng tak dintu Capo Verde coach Bubista in fak a hlawh viau a. CAF coach of the year 2025 hian ngaihven a hlawh leh zual.
Group H a inkhel dang, inkhel hmuhnawm takah Saudi Arabia leh World Cup-a vawi hnih champion tawh Uruguay te 1-1 in an inhnehtawk a, team li ten point khat theuh an hmu.
tlermany hi football ram ropui; World Cup-ah pawh vawi li ngawt champion tawh an ni a. World Cup 2026-ah pawh hian champion tura rinkai zinga mi an ni. Chutihlai chuan NRG Stadium, Houston a an khingpui Curacao erawh chu a vawi khatnan World Cup khel ve nawlh, Fifa ranking-ah pawh No 82-na ni a, WC 26 khel mek zingah Fifa ranking-a hniam ber dawttu an ni a, an intiat tawk lo hle. An inlen hleih em vangin Germany hian awlsam takin hnehna an chan ngei rin a ni.
Rin lawk ang ngeiin Germany in bul an tan tha a, goal pawh an thun hma hle. Inkhel tan atanga minute 6-na lekah Felix Nmecha chuan fuh zeta pet goal in hmahruaina goal a thun. Germany hmahruaina goal thuntu Nnemcha hi England Under 18, 19 leh 21 tana lo khel tawh thin; England aia Germany thlang tu a niin muallaiah a langsar viau a, Curacao lakah a chetla a hmuhnawm tluan.
Hma taka goal chhuah bawk mah se Germany in goal an chhuah ve tlat thung. Pressure nawi lo, nuam titaka inlan Curacao in huaisen takin German rallian an hmachhawn a, Livano Comenencia chuan minute 21-naah goal thunin an si phurh a sut. Team lian takah goal an thun vangin an phur hle a, an phur rei lo thung a, an goal thunin an khingpuite a chhaihkawlh ta hlauh zawk.
goal an chhuah hnuin Germany an insiamtha a, fimkhur leh chak tum zual zawkin an inlan. Minute 38-naah defender Nico Schlotterbeck chuan fuh taka tauh goal in hma an hruai let lehna goal a thun. Hma an hruai nawn leh hnu, chawlhlawk dawn hnaihah penalty an hlawhchhuak zui leh. Penalty hi Kai Havertz chuan minute 45’+5-naah pet goal in an goal thumna a thun a. 3-1 a hmahruai chungin chawlhlawk an hmang.
Chawlhlawk hnu lamah Germany an khel tha chhunzawm a, goal an thun leh thuai. Player ngaihven hlawh Jamal Musiala chuan second half tan atanga minute hnihna lekah an goal lina a thun a, an hmahruaina a tizau leh zual. Musiala goal thun hnu hian Germany tan Nathaniel Brown, Deniz Undav leh Havertz ten goal khat theuh an thun belh leh a, 7-1 ngawtin an chak a, awlsam takin point thum an hmu.
Khawi lam atanga lo kal nge ni?
Germany laka tlawm Curacao hi mipui 156000 lek awmna a ni a, World Cup khel thei ram te ber an ni. WC 26 khel tur hian Confederation of North, Central America and Caribbean Association Football (CONCACAF) atang tling an ni. Concacaf atang hian ram parukin World Cup an khel thei a. WC khel tur zawnnaah group champion pathum te World Cup khel turin an tling hmasa a, chumi zinga mi chu Curacao hi an ni.
Concacaf a ram lian USA, Mexico leh Canada ten World Cup an thlen vangin qualifier an hmachhawn lova, ram lian pathum ngawt awm lo hi Curacao hian an chhawr tangkai a tih theih awm e!
Ivory Coast an chak
Group E a inkhel dang, inkhel hmuhnawm takah Ivory Coast chuan hun tawp dawn hnaih minute 90-naa Amad Diallo goal thun hmangin hnehna an chang a, point thum hlu tak an hmu. Ecuador lakah an chak a, Curacao hmachhawn leh tur an nih vangin Ivory Coast dinhmun a tah a. Curacao hmachhawn zui leh dawn mah se Germany an hmachhawn tel dawn vangin Ecuador dinhmun a derthawng thung.