Rashtriya Janata Dal (RJD) chief Lalu Prasad chuan Union Home Minister Amit Shah chu India Prime Minister hmasa ber Pandit Jawaharlal Nehru a sawisel avangin a khak.
Prasad chuan Shah hian he ram history hi a hre thlawt lo a ti a. Bihar Chief Minister hlui chuan Shah chu tuna Jammu and Kashmir dinhmun mek leh PoK (Pakistan Occupied Kashmir) dinhmun hi a thiamloh a ni a ti.
Nilaini khan parliament a thusawina a neihah Shah chuan Nehru khan tihsual lian tak neiin chuvang chuan Kashmir leh India chuan kum sawmsarih a tuar tawh a ni a ti a.
Hei hi chhang letin Patna-a journalist te hnenah Prasad chuan, “Jammu and Kashmir a inbeihna leh PoK a buaina awm hi Union Home Minister Amit Shah leh Modi sorkar vang a ni. An policy te chu tun dinhmun awmna chhan a ni a. Amit Shah hian he ram history hi a hre lo. Firfiak ten min bei zui zel a, tun hma zawng aiin boruak a chhe zawk a. Heng te hi Amit Shah vang vek a ni” tiin a sawi.
22 November khan army captain pahnih leh sipai pahnihte chu Rajouri a security forces leh firfiak te inbeihnaah an thi a. Kumin chhung hian Jammu region-ah security personnel 13 leh firfiak 22 in nunna an chan phah tawh a ni.
Nilainia Lok Sabha-a Jammu and Kashmir Reservation (Amendment) Bill leh Jammu leh Kashmir Reorganisation (Amendment) Bill 2023 sawihona neihah Shah chuan Article 370 nuaibo avangin inlakhran tumna tawpin firfiakna pawh nasa takin a tlanhniam a ti a.
Shah chuan, “PM hlui Pandit Jawaharlal Nehru khan tihsual lian tak pahnih a nei a, chuvang chuan Kashmir chuan kum tam a tuar a ni. Pakhatna chu kan army te chak laiin inkahhai a puang a, ni thum hnuah inkahhai awm zawk se chuan PoK chu India ram bung a ni tur a ni a. Pahnihna chu kan ram chhung buaina United Nations a thlen a ni a, tihsual palh ni lovin tihsual a ni,” tiin a sawi.
Lalu Prasad chuan Shah chu Bihar atangin Lok Sabha inthlanah ding turin a cho bawk a. Prasad chuan Indian National Developmental, Inclusive Alliance (INDIA) chuan kum 2024 Lok Sabha polls ah chakna an chang ang a ti.
“BJP (Bharatiya Janata Party) te hi Lok Sabha poll ah seat khat an lak pawh kan remti tur a ni lo va, Amit Shah pawh Bihar atanga in candidate turin ka cho a ni,” tiin Prasad chuan a sawi bawk.
INDIA block meeting pawh 17-18 December ah neih a ni ang a, opposition party lian hruaitu lawk te chu an tel vek ang a, BJP beih dan tur strategy duan a ni ang a ti bawk.
Lok Sabha inthlan tur atan political party te chuan inpuahchahna nei tan tawhin tangrualin Modi sorkar chu paihthlak a ni ang a ti bawk.
RJD chief Lalu Prasad an Amit Shah khak
