Nimina Council of Ministers thukhawm chuan ‘Ro Min Rel Sak Ang Che’ tih hla chu “official state song of Mizoram” atan a puang a.
Kan hriat angin Rokunga hla “Ro Min Rel Sak Ang Che” tih hi Mizote chuan ‘Hnam Hla’ tia kan lo hman mek tawh a ni a, tunah chuan “State Song” tih a lo ni dawn ta a ni.
State Song tih leh Hnam Hla tih hi a thuhmun thei chiah awm lo ve. Official State Song of Mizoram a nih chuan Mizoram state tan a ni a, khawvel huapa Zofate a huam lo tihna a ni thei bawk ang. Chutih rualin, Ro Min Rel Sak Ang Che tih hla hi Hnam Hla tia puan awm chiah lo mah se, Khawvel huap Zofate chuan “Hnam Hla” anga kan lo hman tawh a ni a, a hlutna a bo chuang lo. Zofate rilruah chuan Zofa Hnam Hla a ni reng tho ang.
Chu lam chu a enga pawh lo ni se, Mizoram hian Siamtu ro rel sak hi kan mamawh hle tih hi a laimu pakhat a ni. Chumi a nih avanga Ro Min Rel Sak tura Pathian pawh au mek kan ni.
Tun dinhmun maiah pawh, kan hriat angin MPSC leh MZP inkar boruak a awm avangin niminah te pawh office kal tur indan te a ngai a. Chutiang bawkin tun lai hian MIGAHTA lamin lungawilohna an lo lantir ve mek bawk a. Lengpui Airport bul ram inleisak chungchangah inchhui buai ngaiin thil a kal mek bawk a. Mizoramin buaina leh harsatna a tawh mek hi sawi dawn chuan phek tam tak daih a awm. Ro min rel sak hi chu kan va ngai tehlul em!
Tichuan, Mizo hnam hla (state song) hi tunhma atang tawhin YMA leh pawl hrang hrangte pawhin inkhawmpuinaah rorel inkhawm neih dawnin sak a ni thin a. He hla sak a nih lai hian rilru leh tihtak zeta Pathian au chunga sak a nih chuan, awmzia thui tak a nei turah kan ngai a ni. He hla kan sak zawha ro kan rel lai hian kan hnam hla hi kan rilruin kan vawng zui reng ang em tih hi zawhna pawimawh tak a ni awm e.
Chuvangin aw kan Pathian,
Hei hi kan dil ber che,
Kan ram kan hnam min hruaia’n,
Nang chauh kan thlang a che.
Chhung lam leh pawn lam hmelma,
Indona thleng mah se,
Hneh zel turin min pui la,
Ro min rel sak ang che.
Ro Min Rel Sak Ang Che
