Road tax tisang siin kan
supply line ala chhe reng
– Lalchhandama Ralte
Sawrkarin road tax tisangin, an cess lak chu kawng siamna atana hmang tura insawi siin, kan supply line a la chhe em em reng tih leader of opposition Lalchhamdama Ralte chuan a sawi.
Tuivawl bialtu MLA Lalchhamdama Ralte hian a bial a fang mek a. ZPM chu a thlangtlingtu mipuiin an ning tan mek nia sawiin, “Sawrkarin kawng siamna tur tiin road tax a tisang a, oil man an tisang a, an cess lak chu kawng siamna atan kan hmang dawn, ti reng chung siin, kan supply line kawng a la chhe em em reng a ni,” a ti.
Buhfai man a let thawka an tisang chungin kan hnianghnar phah lem lo tih a sawi a. MNF sawrkar lai, buhfai man Rs.15 a nih lai khan buhfai kudam a khat tlangpui a, vawiinah chuan ration la tur khaw hrang hrangten an nghak rei thin hle tih a sawi. “Tun dinhmunah khuarel chhiatna thleng palh thut ta se, tam hmachhawn thei dinhmunah kan ding mek. MNF sawrkar lai khan ration buhfaiah kan hnianghnar hle a, dah hmasakte a chhe hman ang tih hlauhawm khawp a ni thin,” a ti.
Sawrkar kan hrawn mek chuan leiman, chhiah hrang hrang a tipung a, harsatna hrang hrang kan tawk mek nia sawiin, a theihna apiangah mipui min sawrfu niin a sawi.
MNF sawrkar khan kawng tam takah ram hmasawnna a thlen tih MNF vice president Lalchhandama Ralte hian a sawi a. ZPM chuan zirtirtu indaih lohna pawh dah belh aiin, a awmchhunte min sawn chhuah sak chur chur zawk tih a sawi. VC inthlanah MNF chuan hnehna sang tak chan tumin hma an lak mek tih a sawi bawk.
Road tax tisang siin kan supply line ala chhe reng – Lalchhandama Ralte
