Brazillian footballer thin, a vanglaia khawvel footballer tha ber pawl ni thei Ronaldinho chuan rimawi lamah huang zauhin, a record label thar Tu Musica hnuaia album hmasa ber ‘CAMISA 10’ chu June ni 9-ah a tlangzarh dawn ta. HHe album-ah hian artist hriathlawh tawhsa Sean Paul pawh a tel dawn a, zaithiam dang Justin Quiles, Luis R. Conriquez, Lenny Tavárez, Dalex, Jon Z, Fariana, Jonas Blue te pawh an tel.
Sean Paul chuan, “Ronaldinho hi legend a ni a, he Lei-a show ropui ber, khawvel huap football intawhkhawmna special tak lo thleng tur nena inrualin a projecta min rin lut hi ka lawmin ka phur hle a ni. He hla hi hringnun a hmalam pan a ke pen tumte tana nun hruaitu tur a ni. Hmeichhe chhungchang te lang mah se hnehna chan nawmna feeling kha a thu laimu chu a ni. Team chak zawk te fuih tur leh an tan zawng team-te support-tu te chawkphur tu tur a ni,” a ti. He album hi FIFA World Cup tan hma lawk a tlangzarh tur a ni.
Ronaldinho hian Tu Musica hi kumin March thla khan a din a, ‘CAMISA 10’ chu a record label hnuaia album tlangzarh hmasak ber tur niin, a label hi Miami a hmunpui nei niin, artist, culture leh market inthlunkhawmna tur platform thar din tumna rilru nena a din a ni a, a tir lamah chuan Latin America lamah insawrbing hmasain khawvel huapin an inzarpharh zel dawn a ni.
CAMISA 10 album-ah hian ram hrang hrang 18 atangin artist 44 an tel a, USA, Mexico, Colombia, Argentina, Venezuela, Brazil, Spain, France, United Kingdom leh Jamaica atanga artist te pawh telin, music genre hrang hrang dancehall, Latin pop, regional Mexican, afrobeats, piseiro, cuarteto leh urban music te an hrut a ni.
A album hminga ‘10’ tel hi Ronaldinho No.10 jersey hak thin an tarlanna a ni.
Ronaldinho-a’n rimawi lama huang a zauh ta
