Rooftop solar scheme kalpuiah
Mizoram-in lawmman a dawng
Mizoram Power & Electricity department chuan PM Surya Ghar: Muft Bijli Yojana (Rooftop Solar) a kalpuiah hmarchhak state zinga titha lawmman a dawng.
Sawrkar laipui Ministry of New and Renewable Energy (MNRE) in India rama nizung chakna hmanga kawlphetha tihpun kawnga hmalakna, PM Surya Ghar: Muft Bijli Yojana (Rooftop Solar) a kalpui mekah Mizoram chu a tih that avangin Top Performing North East State-ah a thlang a. October 31-a Regional Workshop on Renewable Energy- North East Zone, Guwahati-a neihah Union MNRE minister Pralhad Joshi chuan lawmpuina thuziak a hlan.
Thawhtannia department hotute nen an thutkhawmah P&E minister F Rodingliana chuan thawktu officer-te leh rooftop solar installation titu vendor-te chungah lawmthu a sawi a. Mizoram-in kawlphetha a intodelh tura hma a lak mekah hydel project lama hmalakna piahlamah solar hmanga power tharchhuah tihpun zel chu a pawimawh, tiin, nasa zawka beihpui thlak zel turin a chah.
Minister ho hian rooftop solar hmanga kawlphetha tharchhuah tihpun zelna atan district headquarters leh thingtlang khaw hrang hrangah nasa zawka hma lak dan tur rel a ni a. Mizorama PM Surya Ghar: Muft Bijli Yojana scheme hnuaia mimal ina rooftop solar vuah kalpui mekah central subsidy 60% bakah state sawrkarin 20-25% subsidy pek a ni thi sawi a ni.
Thutkhawmah hian thli (wind energy) hmanga Mizoram-a kawlphetha siamchhuah theih dan zirchiang tura WINDERGY India 2025 International Trade Fair and Conference October 29-31 chhunga Chennai Tamil Nadu-a buatsaiha tel P&E secretary K Lalrinzuali pawhin report a pe bawk.
Mizoram hmun hrang hranga smart meter vuah mek chungchang inzirtir leh mipui harsatna sukiang zung zung thei turin junior engineer zawng zawng tan training buatsaih rel a ni.
Rooftop solar scheme kalpuiah Mizoram-in lawmman a dawng
