2026 Grammy Awards semnaah BLACKPINK member ROSE a perform dawn tih an puang a, kum khat chhunga rimawi lama zan ropui ber an tihah hian ROSE hi a perform hunah chuan mahni (solo) a K-pop artist he event-a perform hmasa ber a ni ang.
Grammy stage-ah hian 2020 khan K-pop mipa group BTS an perform tawh a, chumi tum chuan Lil Nas X/ Billy Ray Cyrus te la hit ‘Old Town Road’ karah an inlan a, 2021-a anmahni puala perform-in ‘Dynamite’ an perform a, 2022-ah ‘Butter’ an perform leh bawk. Mahse, anni hi group anga perform an ni.
ROSE, kum 28, hi kumin Grammy-ah hian Bruno Mars nena an zai dunna ‘APT.’ avangin record of the year, song of the year leh best pop duo/group performance-ah te nominate a ni bawk.
K-pop hian khawvel a al hneh telh telh a, Grammy stage-ah meuh paw K-pop artist an perform ta zak zak a, tunah chuan ROSE chu solo artist angin Grammy stage-ah a perform ve leh dawn ta a, solo K-pop artist anga he stage-a perform hmasa ber a ni dawn ta a ni.
Kumin Grammy semnaah hian girl group KATSEYE pawh an perform dawn a, anni hi Philippines, South Korea, Switzerland leh US atangin member an nei a, best new artist nominee an ni bawk.
Kumin Grammy-ah hian Addison Rae, Alex Warren, Andrew Watt, Brandy Clark, Chad Smith, Clipse, Duff McKagan, Justin Bieber, Lady Gaga, Leon Thomas, Lola Young, Lukas Nelson, Ms. Lauryn Hill, Olivia Dean, Pharrell Williams, Post Malone, Reba McEntire, Sabrina Carpenter, Slash, sombr leh The Marías te pawh an perform dawn.
68th annual Grammy Awards hi February ni 1 (keini ramah chuan February ni 2 a ni hman tawh ang) hian an sem dawn a, award semna hi comedian Trevor Noah-a’n a host leh dawn a, ani hian he award semna show hi a zawnin tum ruk a host tling dawn ta a ni.
ROSE-i’n Grammy-ah record siam thei dawn
