Riverine Reserved Forest Notification thiah duhtu, Kolasib district-a four lane sial tumin a paltlang tur ram neitute chuan an thil phut hrang hrang tihhlawhtlin phutin September 25 zingkar atangin national highway dan an tum.
Vairengte to Mualkhang inkar kawngpui dunga ram neitu, Kolasib District Land Owners’ Association chuan sawrkara thilphut an neihte tihhlawhtlin a nih loh chuan Sethawn RTP farm-ah September 25 zing dar 6.00 atangin kawngpui an dang ping dawn tih an sawi.
An thil phut zingah, ram neitu nihna (ownership of land) hi sawrkarin chingfel rawh se: RRF Notification 1965 hi ram hmasawnna daltu a ni a, thiah ni rawh se; four lane project hi tihhlawhtlin ni rawh se; kum thum chuang hma la thei loa kan ram min khuahkhirh hi sawrkarin sut rawh se, tih te a ni.
Land Owners’ Association hruaitute sawi danin, kum 2021 khan Gauhati High Court chuan RRF Notification 1965 hi hman tlak loh, mihring chenna in leh loa khat tawh a ni, tiin a thiat a; hei hi Forest department chuan pawm loin, environmental NGO te punin Supreme Court ah an zualko a, hei hi Mizoram sawrkar pawhin thlawpin he Notification hi stay an dil ta tih an sawi.
Vairengte leh Sairang inkara chengte hi Forest department chuan ‘reserved forest’ chhuanlamin an huan lo ram chhuhsak mek a; dan loa awm leh hnawhchhuah theih reng angin chhuah mek an ni tih Land Owners’ Association hruaitute hian an sawi a. State sawrkar chu an dinhmun a rang lama chingfel turin an beisei tih an sawi a ni.
RRR Notification thiah duhin NH kawng dan tum
