Ramhlun Sports Complex-a sawrkarin ram a lo theh tawh chu Aizawl North-II bialtu MLA, minister Dr Vanlalthlana leh Land Revenue & Settlement minister B Lalchhanzova te chuan Thawhlehni khan a hmunah tlawhin khawtlang hruaitute an sawipui.
Ramhlun Sports Complex Veng hian kum 2013 khan lei min nasa tak an tuar a. An ni bakah hian hemi kum veka Laipuitlang leh Ramhlun Venglai leimin avanga in leh lo chan an awm bawk. Leimin avanga in leh lo chante tan hian sawrkar chuan Ramhlun Sports Complex chuanhnuaia ram chu ruahman sakin, in hmun tur thehin a lo teh fel sak tawh a ni.
Ramhlun Sports Complex Vengthlanga inbengbel tam ber, in leh lo chan ta te hian an LSC hmasa chu sawrkar hnenah an lo hlan (surrender) tawh a. In hmun tur theha teh fel ni tawh mah se, in hmun lehkha – house site pass emaw LSC emaw an beisei anga an neih mai theih loh avangin bialtu MLA leh Revenue minister-te hi hma lakpui turin an ngen a ni.
Heng lai hmuna chengten LSC an neih thuai theih nan a tul anga ramri enfel a, ram neitu tur dik takin ram an neih theih nan leh, a rang thei ang bera LSC pek chhuah a nih theih nan sawrkar chuan hma lak a tum thu sawi a ni.
RSC hmuna ram theh tawh enfiah
