India hmarchhak, a bikin Mizoramah ruah nasa taka sur thei a nih avangin mipui fimkhur a, inralring tura hriattir an ni.Sawrkar laipui Ministry of Earth Sciences hnuaia India Meteorological Department chuan August 3 khan khawchin thlirna tichhuakin, August 4 (Pathianni) atanga August 10 (Inrinni) inkar hian Mizoram hmun hrang hrangah ruah tam tak sur thei reng a ni tih a sawi a. India hmarchhak, a bikin Mizoramah August 5 (Thawhtanni) ah ruah tam tak sur thei a ni a, chhiatna theng thei lakah mipui fimkhur turin a hriattir a ni.
Mizoram Disaster Management & Rehabilitation department chuan he hriattirna avang hian mipui chiai loa, fimkhur taka inpuahchah lawk tho turin a chah a. Hemi chungchangah hian mi tumahin thu belhchian dawl lo thehdarh loh turin a hriattir lawk bawk.
Chutihrualin, ruahsur avanga chhiatna thleng palh theiah State/ District/ Village Level Disaster Management Committee te a tul anga lo inringlawk turin a hriattir a. Mahni bialtu zonal officer-te hnenah a rang thei ang bera hriattir turin a hrilh.
He thuchhuak ang hian District Disaster Management Authority chairman, bawrhsap tinte pawh hriattirna chhuah tura tih an ni angin an chhuah a ni.
Ruah nasa tak a sur theih vangin inralring turin chah
