Ruah sur mumal lo rei tawh

Ruah tui tamna Mizoramah ruah a sur mumal lo rei tawh a, kum hlui tawp lam atangin, kum thar hnu thlengin, tih tham a sur lo rei tawh.
State Meteorological Centre chhinchhiahna enin, tun hnai thla thum vel chu Mizoramin ruah tui a dawng tawh lo tiin a sawi theih.
Kuminah ruah a sur tawh tiin a sawi theih a, State Meteorological Centre-a an chhinchhiah danin, January ni 6-ah khan ruah tui mm 0.2 a tla a, hei hi ruahah a chhiar theih rualin a chhiar loh theih bawk. Ruah tui mm 0.2 hi teh tham ngawr ngawr chauh a ni a, January ni 6-ah khan mipuiin ruah a sur an hre lo ang. State Meteorological Centre enkawltute pawhin a tehna hmuna dai tla vel a ni thei tih an sawi a, mahse a tehnaah a lan ve miau avangin chhinchhiah chu a ngai tih an sawi.
Dai tla a ni emaw ruah tui a ni emaw, ruah tui mm 0.2 hi eng tham a ni lo a, January ni 6-a mi chauh ni lovin ruah tui hnuhnungte kha mm 0.2 chauh a ni bawk; kum hlui December ni 29-ah khan mm 0.2 a tla a, November ni 11-ah khan mm 0.2 bawk a tla. Chung chu ruah hnuhnung a ni rih.
Nikum November ni 11 hmaa tih thama a sur hnuhnun ber chu November ni 6 kha a ni a, mm 40.6 a tla. Nikum November ni 6 hnuah ruah a sur mumal tawh lo a, thla hnih leh a chanve vel chu ruah tui a awm tawh lo tiin a sawi theih ang.
November ni 6 hma pawh khan tam thamin a sur lo rei hman a, October ni 24-a mm 23 a sur kha a ni mai ang.
Mizoramah ruah hi thla tin a sur tia sawi theih a ni a, January-a a sur loh chang a awm fo bawk. Nikum pawh khan a sur lo a, 2023-ah khan a sur lo bawk.
State Meteorological Centre lam chuan khawchin thlirlawkna lamah ruah sur tura sawi a awm rih lo tih an sawi a, ruah a sur loh zel vang nge, January thla tawp lamah khua a vawt ta vak lo bawk.