Disaster Management & Rehabilation minister Prof Lalnilawma chuan tunlai ruahsur nasa avanga Mizoram hmun hranga hranga harsatna thleng mekah chiai lo tur leh harsatna tawkten thuneitute hnena thlen thuai turin mipui a ngen a, DM&R chu koh theih rengin an awm tih a sawi.
Minister hian thuchah tichhuakin, tunhnaia ruahsur nasa avangin hmun hrang hrangah leimin leh kawng ping a awm thu leh heng harsatna tawkte tanpui turin khua leh veng tinah zonal officer an awm thu a sawi a. Village level leh local level-ah Disaster Management Committee a awm bakah bawrhsap tin kaihhruaiin District Disaster Management Committee din vek a nih thu sawiin, an ni hnenah hian harsatna leh buaina tawkten rang taka report thin turin a ngen.
Mipuiin smart phone application kaltlanga harsatna an thlen theihna tura DM&R department chuan ‘Khuarel app’ a siam chu hmang tangkai turin mipui a chah a. A bikin veng chhung leh khaw kar kawngah leiminin kawng a lo hnawh ping emaw a lo dang emaw a nih chuan, Khuarel app hmang hian report thehluh theih a ni, tiin, zonal officer leh bawrhsap ten an lo hmu thuai anga, hmalak dan tur rang takin an ngaihtuah thei dawn tih a sawi a ni.
PHE minister ni bawk Prof Lalnilawma hian tui sem kawnga harsatna thleng thei pawh sawiin, tunhnai ruahtui tam zualah Aizawl chawmtu, PHE department-in tui lakna atana a rinpui ber Aizawl Greater Water Supply Scheme Phase-III chu leiminin a hnawh ping a, tui pump theih a ni lo tih a sawi a. Setlak lam atanga gravity hmanga tui fim pump tura an lakluh thin pawh Aizawl Western by-pass road siam mek atanga leivung awmin a tih nut ve leh avangin harsatna an tawk mek a, tui harsatna awm theiah mipui hriatthiamna a ngen tih a sawi.
Ruahsur vanga leimin report turin ngen Aizawl mipui tan tui harsatna awm thei
