Spanish football federation president Luis Rubiales-a nu Angeles Bejar chuan Women’s World Cup final lawmman sem laia a fapain Spain forward Jenni Hermoso lawmman dawng zo a hmuia a fawhsak avanga a fapa tawrhna thleng mek duh loin Thawhtanni atang khan biak in chhunga inkalhkhum chungin chaw a nghei!
Rubiales hian Spanish football federation (RFEF) inkhawm hmanhmawh an koh tumin a hna atanga ban a tum loh thu leh tihsual a neih loh thu sawi chungin dik lo taka sawichhiatna leh beihna tuartu a nih thu a sawi a, a nu chuan a fapa leikona hi pawmpuiin, dik lo taka tihchhiat tuma beih tawkah a ngai a, a lungawiloh lantirna’n chaw a ngei a, Motril khaw biak in pakhatah a inkharkhip mek!
Kum 46 mi Rubiales chuan sawiselna nasa tak tawk chunga ban a tum loh avangin a khawsak danah hremna lekkawh tur a ni em tih chhui a nih chhung atan Fifa chuan Spain ram leh international huap football thiltihna tawh phawta inrawlh thei lo turin Inrinni khan a ‘suspend’ a; a fapa an tih dana lungawi loin Angeles Bejar chuan Spain chhim lam tuifinriat kam khawpui Motril-a Divina Pastora biak inah chaw a nghei mek a, Spanish news agency EFE hnenah chhun leh zan tluan parhin tiam chin awm loa chawnghei a kalpui tur thu a hrilh.
Spanish FA chief khan inhriat-thiamtawnna hmanga fawp a nih thu sawi mah se kum 33 mi Hermoso chuan amah lamah kha thil kha pawmpuina a neih loh thu a sawi ve thung.
Kiss thubuai kal zelah hian Spanish Football Federation regional president theuhte chuan RFEF president a nihna atanga inhnukdawk turin Luis Rubiales hi an phut tih thuchhuah intawm siamin an tarlang.
Kum 33 mi Hermoso khan a remtihna tel loa kha infawhna kha thleng a nih thu a sawi a, Spanish prosecutor-te pawhin kha thil thleng kha hursualna lamhawia inkhawihna a tling dawn em tih chhuina hmasa an kalpui tan tawh bawk.
Rubiales-a nu chawnghei tan ni Thawhtanni tlai lamah khan Madrid khawpui lun laiah chuan mi za tel pungkhawmin protest an kalpui a, he’ng kalkhawmte hi hmeichhiate dikna auchhuahpuitu pawl hrang hrang niin, Hermoso thlavang hauhna leh Rubiales demna an auchhuahpui.
Rubiales-a nu chawngheiin a nuar!
