Excise & Narcotics minister Lalnghinglova Hmar chuan Nilaini khan Guwahati-ah Assam sawrkara Excise department hotute kawmin ruihhlo do chungchang a sawipui a, indawr zui zel bakah hmalak dan tur an rel.
Assam Excise minister Keshab Mahanta nen inhmu tur an nih laiin, Assam minister hi tul bik thilah a remchan loh thut avangin phone-in an inbia a, hmalak dan tur an sawi dun. Lalnghinglova Hmar hian state pahnih harsatna tawh mekah uluk zawka inbiak tha a tih thu a hrilh a. Assam minister pawh hian tha tiin, Excise chauh ni lo Home department nen sawihoa tan lak a tul tih an sawi a ni.
Assam Excise minister ruahman angin Assam sawrkara Excise secretary Indreswar Kalita leh commissioner Jitu Doley te nen ruihhlo do kawnga state pahnih thawhho dan an sawi a ni.
Mizoram Excise & Narcotics minister chuan Myanmar atanga heroin lokal chu Assam huamchhungah siam danglamin, ‘Bagha cap’ tia vuahin Mizoramah a lo lut leh thin tih a sawi a. Damdawi hmansual chi an tawlh luh thin dan leh Assam chhunga khaw thenkhatah ruihhlo zuarte an zalen hle nia Mizoram atanga hriat a nih thute a hrilh a ni.
Assam Excise hotute chuan minister sawi hi an bawhzui tur thu an sawi a. Remchang hmasa berah an minister hoa sawikhawm a, an zirchian tur thu leh, Mizoram minister rawtna anga state pahnihte ruihho do kawnga inkawm leh thuai tha an tih thu an sawi a ni.
Ruihhlo do kawngah state pahnih thawhdun tha an ti
