Mizoram sawrkarin state pum huapa ruihhlo do beihpui thlak a tumnaah a tula hman turin cheng vaibelchhe 3 semchhuah a ni tawh tih Working Committee on Ruihhlo Do chairman, Social Welfare minister Lalrinawma chuan a ti.
Siaha-a District Level Task Force on Ruihhlo Do thutkhawm a telpuinaah Excise & Narcotics minister ni bawk Er Lalrinawma chuan Mizoram atanga ruihhlo umbo a nih theihna’n sawrkarin theihtawp a chhuah a. Ruihhlo do na tur hian cheng vaibelchhe 3 chu semchhuah tawh a ni, tih a sawi. Sawrkar chauhin ruihhlo a do hneh theih loh avangin NGO-te nen thawhhona tha tak neih a ni, tiin, “Ruihhlo do hi thil awlsam tak a ni loa, inpumpekna leh tanho ngai tak a ni. Thalaite ruihhlo laka an fihlim zel theihna’n thawhhona tha a pawimawh takzet a ni,” a ti.
Siaha district chu Myanmar nena ramri nei a nih avangin nasa zawka ruihhlo do kalpui a tul tih a sawi a. Tun dinhmuna Siaha District Level Task Force on Ruihhlo Do hmalakna fakawm a tih thu sawiin, ram leh hnam tana thawk an ni tih inhre reng turin a chah.
District Level Task Force on Ruihhlo Do chairman, district bawrhsap Lalhmunsanga Hnamte chuan tun thlenga hma an lak tawh chin leh hmachhawp te a report a. Tunah hian an district-a village council 31-ah Village Level Task Force an din tawh a, din belh tura hma lak mek zel a ni tih a sawi. District Task Force-ah hian a kaihhnawih sawrkar department hotute bakah Mara Thalai Pawl, Mara Students’ Organisation leh Mara Hmeichhe Pawl (MChP) bakah MJA Siaha District aiawhte an tel a ni.
Ruihhlo do nan vbch.3 sem tawh
