Ruihhlo donaa dan hriat tur inhril

Thawhlehni khan Kolasibah sawt zawka ruihhlo do kalpui a nih theihna’n dan hnuaia hmalak dan inzirtir a ni.
Hun kaihruaitu district bawrhsap John LT Sanga chuan ruihhlo chu ram leh hnam hmelma a nih angin, a do rem hna kalpuinaah tlawmngai pawl leh sawrkar office hrang hrangte tanrual a pawimawh tih a sawi a. Ruihhlo dona kawnga thawktute thawhrimna chuan awmze thui zawk a neih theihna’n ruihhlo zuartute leh an thil zawrh man, dapchhuah leh hremna kawnga dan pawimawh tak takte chu hmelhriat thar a tul tih a sawi.
Kolasib District Fast Track Court judge Julie Lalrinzami chuan Kolasibah ruihhlo leh a kaihhnawihah thubuai chinfel tur 42 a awm mek a, ruihhlo vanga court-a inlante chu a neitu tak an ni lo tlangpui thin tih a sawi. Dan chu khawtlang thatna tura ruihhlo doa tlawmngaia kalchhuak thinte kut phuarna ni loin, heng hmalaknate sawt zawka kalpui a nih theihna’na hmanraw tangkai hman tur a ni tih a sawi a. Dan hriat loh avanga heng thawhrimna leh hmalakna hian a nih dan tur anga awmzia a neih thin loh thu sawiin, “Dan hriat lohna hi hremna pumpelh na’n chhuanlam a tling lo,” a ti.
Chief judicial magistrate Cacy Malsawmtluangi Ralte chuan court hnathawh zinga pawimawh ber chu mihring dikna chanvo humhalh sak a ni, tiin, ruihhlo do kawnga hmalaknaah heng dikna chanvo hi ngaihpawimawh tel thin a tul tih a sawi a ni.
Thutkhawmah hian ruihhlo do kawnga tlawmngai pawl che chhuak thinte hriat tur sawi ho a ni a. Dan bawhchhetute man tura sawrkarin thuneihna a pekte mawhphurna sawi niin, NGO-te tan legal adviser neih a pawimawh thu te sawi a ni. Sub-Hqrs YMA Kumpuan Committee, Joint Village Council, Bar Association, advocate, SP office, Chief Medical Officer office, District Medical Superintendent, Excise & Narcotics department, District Jail-a hotute leh official dangte an tel.