Ruihhlo donaa YMA beilet duhte hmachhawn zel dawn
– CYMA president
YMA-in ruihhlo a dona kawnga lo beilet an awm a nih chuan an hmaah hruaitute an ding zel dawn tih Central YMA president Lalhmachhuana chuan a sawi.
Zirtawpnia Chhimphei Group inkhawmpui vawi 53-na a hmanpuinaah Lalhmachhuana chuan, ruihhloin Mizo hnam a eichhe mek a, a eichhiat zel lohnan ruihhlo doa beih let a tul hle tih a sawi. “Hetiang ruihhlo kan dona kawnga YMA lo beilet duh kan awm a nih chuan, a hmaah hruaitute kan ding zel dawn,” a ti.
Intodelh chu ram leh hnam damna atana kan mamawh a ni, tiin, kan phak tawk theuhah mahni intodelh tuma taimak chhuah turin YMA member-te a fuih a. Kan pawnlam lan dan leh kan incheina ringawt mawi loin, kan nun a mawi a pawimawh tih a sawi. YMA member-ten social media kan hman thiam a tul tih Central YMA president hian a sawi a. Kan nunhona leh social media-ah pawh Zonunmawi – hawihhawmna, aia upa zahna leh tlawmngaihna lantir a, nunchhuah pui fo turin a chah.
Ruihhlo donaa YMA beilet duhte hmachhawn zel dawn – CYMA president
