Tunhnai thla ruk chhungin Mizoramah heroin kg. 49 chuang man a ni tawh a, chu chu cheng vaibelchhe 70 chuang hu a ni. Hei hi Mizoram Police leh Excise and Narcotics tena an man belhkhawm a ni.
Ruihhlo buaipui han tih hian, buaipui dan a inang lo hlawm hle. Ruihhlo hmanga sumdawng an awm laiin, ruihhlo hmanga sumdawngte man chhuah tum an awm a. Ruihhlovin a tih hreawmte chhan chhuak tura beitu pawl an awm leh a, home/centre a pian chhuah phah a, NGO leh sawrkar leh kohhran ten an hahpui leh em em a.
Ruihhlo hmanga sumdawngten kan ram, kan khawtlang, kan veng, kan chhungkua leh mimal an tih hreawm dan leh an tihbuai dan han chhut chian hi chuan, ruihhlo hmanga sumdawngte hi lei si lo van tawng lova khai kan vaw vaw a duhawm rum rum thei mai awm e.
Ruihhlo lo lut tur dang tura sawrkarin tha a thawh dan hi, thuruk a niha mipuiin kan hre pha lo a nih pawhin, heti tak maia kan ram chhunga ruihhlo chi hrang hrang a lo lut ruih ruih reng mai han hmuh hian, kan lo dang hneh lo chai chai hle tih a hriat reng mai! Ruihhlo lo lut tur hi chu kan dang hneh lo a ni tih hi, tlawma la lovin pawm thlap ila, a hahdamthlak mai awm e.
Kan ram chhunga ruihhlo lo lut lah hi, tuna report kan hmuh ang khian, thla 6 chhungin heroin kg 49 man a ni a, tunhma kum 10 chhunga heroin man belhkhawm ai pawhin a tam daih tawh. Chu pawh, report dawn bawhzui leh rinhlelh atanga man chhuah a ni mai a, report dawn loh leh rinhlelh lohtena an paipawn ruk manchhuah si loh hi engzat faukau tak awm ang maw? Ruihhlo man chhuahte hi chu sap hovin ‘the tip of the iceberg’ an tih ang vel hi a nih a rinawm. A hmawr lo lang det det chin ringawt pawh hi a tam tham viau a ni.
Sawi leh sawi hnu, kan ramah ruihhlo ngai thalai an tam tih chu tlang hriat a ni, chutih laiin, ruihhlo sumdawnna kalka ber kan nih avangin, ruihhlo man chhuah tam zawk hi chu Mizoram chhunga thehthang tur ni lovin, state pawn lam hmun hla zawka la kal zel tur te a ni hlawm awm e.
Eng pawh nise, state ralmuang kan nihnate hi a ruka thil dik lo ti duhte tan chuan vanram tlafual hi a ni hawt mai a, a phawvuaka state ralmuang kan intih fo phenah hian a lehlamah chuan a ralmuang lo hle zawk niin a lang a, hei hi kan ngaihtuah ngun a, a chinfel dan kan zawn hi a pawimawh hle. Ruihhlo chuti zat chu man a ni, a neitute thubuai siamsak an ni, tih information hmanga inawih tlei kan tum mai mai a nih chuan, eng ruai kan ang dawn lo. Tuna kan thuvawn atana pawimawh chu, ruihhlovin a la tihbuai phak loh naupang leh thalaite ruihhlo laka humhim hi ruihhlo dona tha ber a ni, tih hi.
Ruihhlo kan buaipui dan hi
