Chief minister leh Presbyterian Church of USA aiawhte chuan Mizorama ruihhlo ngaite enkawlna kawngah thawh hona a awm theih leh theih loh chungchang sawihoin Thawhlehni khan an thukhawm a. Chief minister hi Social Welfare minister Lalrinpuii leh Excise & Narcotics minister Lalnghinglova Hmar ten an tawiawm.
Presbyterian Church of USA aiawhte hian tunhnaia Aizawl leh a chhehvela ruihhlo lama harsatna nei an hmuhte leh ruihhlo ngai enkawlna an tlawh theih chin atanga an thil hmuh dan leh hmalakna awm thei tur nia an ngaih an sawi a. United States lama an kohhran leh mi inphal, sum leh pai thawh thei dap lamah harsatna an neih loh tur thu an sawi rualin, thawklehkhata hmalakna lian tak kalpui nghal mai erawh a harsat deuh theih thu an sawi a ni.
Thil pawimawh hrang hrang an sawiho hnuah chief minister hian an hmalak theih dan tur ruahmanna mumal nei rang turin a hrilh a, chumi mil chuan hmalak dan tur an sawi zui leh dawn a ni.
Presbyterian Church of USA aiawh hian Rev Vanlalrosanga Ralte leh a thawhpuite an rawn kal a ni.
Ruihhlo ngai enkawl kawnga thawh ho theih dan ngaihtuah
