Nimin zing khan Aizawl Chanmari branch YMA chuan YMA Chhang pualin ruihhlo do programme an hmang a. He hunah hian YMA Chhangten ruihhlo laka fihlim turin leh ruihhlo ti lo tura intiamna an nei nghal a.
Ruihhlo donaah hian tunhma deuh atanga kan ngaih pawimawh zual chu supply reduction kha a ni thin. Ruihhlo man tur kan zawng a, kan man nasa bawk a, mahse a demand a awm chhung chuan supply lam hi chu a tawp thei dawn lo niin a lang.
Mizoramah ruihhlo thihpui an awm atanga kum 40 chhunga ruihhlo avanga thi hi END-in an record dan chuan mi 1779 a ni a. Chumi awmzia chu chawhrualin kum tin ruihhlo avangin mi 44 an thi a, thla tin mi pathum (3.7), chu chu ni 10 dana pakhat zel thi ang a ni. Ni 10 dana ruihhlo ngai pakhat thi ziah ang kan nih tak chu; a theuneu lo hle a ni.
Supply reduction lama hma kan lak nat tluk bawk hian demand reduction lamah pawh hian hma lak nasat a ngai tih a lo lang chhuak zel a. Tunhmaa kan hriat ngai loh, kumtling lo zingah ruihhlo ngai an lo pung chho leh ta tlat mai a. Tun laiah ruihhlo (supply) a hluarzia kan hmu a, ni tin deuhthaw ruihhlo cheng vaibelchhe chuti zat man chu man a ni, tih thuthar hriattur a awm reng a. Tunhmaa heroin gram 100 man a niha ‘a tam’ kan tihte kha chu tunah chuan a nep ta hle a. |um khatah heroin Kg 4/5 (Gram 4000/5000) man a nih thu hriat tur a awm ta fo mai a nih hi.
Hetiang karah hian tuna naupang thang lian chho mekte dinhmun hi a ngaihtuahawm takzet a. Kum an tlin hma hian ruihhlo thatlohzia te, a hlauhawmzia te hrilh mawlh mawlh a, ruihhlo ti lo tura intiamtir te hi ruihhlo dona hmanrua atan a tangkai dawn hle a ni. Thlai pawh a lo tiak hlim tui ngun taka pek chu an lo thang tha ang hian, naupangte pawh hi an tet te atanga ruihhlo hlauhawmzia leh thatlohzia an thanlenpui phawt chuan, demand a kiam tawlh tawlh ang a, supply pawh a tlem chho ve mai dawn a ni.
Ruihhlo ti lo tura intiam….
