Ruihhlo vangin thalai hman
tlak loh kan tam phah tawh
– Prof Lalnuntluanga
Ruihhlo ngaih avangin Mizo thalai hman tlak loh kan tam phah tawh hle tih Central YMA hruaitu Prof Lalnuntluanga chuan a sawi.
February 24 zana YMA Sakawrtuichhun Branch-in YMA kumpuan – ‘Ruihhlo D’ an hawn a hmanpuinaah Central YMA vice president Prof. Lalnuntluanga chuan, Mizo thalai tam takin ruihhlo an lo ngaih tak avangin thalai hman tlak loh tam tak kan neih phah ta a, mi tam takin a hun loah mual min liamsan phah bawk tih a sawi. Hengte avang hian YMA chuan thalaite ruihhlo laka an fihlim a, kan hnam a dam theihnan kumpuanah a vawi li-na atan ‘Ruihhlo Do’ a puang leh ta a, kan hnam a dam a, hnam zahawm kan nih leh theihnan kan zavaia tangrualin ruihhlo kan do a ngai tih a sawi a ni.
February 24 zan veka YMA Hunthar Branch-in YMA kumpuan hawn a hmanpuinaah Central YMA general secretary Prof. Malsawmliana chuan, ruihhlo chu chhungkaw tikehtu, thalai nun suattu, fahrah leh hmeithai tam tak siamtu a nih avangin tha thlah loa kan do a tul takzet tih a sawi a. Mizorama Home leh Centre hrang hranga awm tam ber chu ruihhlo leh a kaihhnawih vanga awm an ni, tiin, “Naupang enkawlnaah pawh chhungkaw inrelbawlna tha lo avanga enkawl an tam a; kumtling lo zingah Pathian awm ringhlel hial an pung ta chu ruihhloin a hrinchhuah a ni,” a ti.
Ruihhlo hian pawikhawihna a tipung a, chhungkua tlakranna a siam tih a sawi a. YMA-in ruihhlo a do avang hian chhungkaw tam tak, ruihhlo avanga hlim ni hmel hmu tawh lo leh kehchhe tawhten hlimna hmuh phah se tih chu an duh ber a ni a. Ruihhlo zuartute kan society-ah leng lo se, endawng an ngai tih a sawi bawk.
Kumpuan hawn rual hian Hunthar YMA chuan an member – B Lalnunfela, Syed Mushtag Ali Trophy Plate Group-3 2025 a Mizoram Team member chu an chawimawi nghal a ni.
Ruihhlo vangin thalai hman tlak loh kan tam phah tawh – Prof Lalnuntluanga
