Ruihhlo zuarte hausakna it lo ang – Central YMA president

Ruihhlo zuarte hausakna it lo ang
– Central YMA president
Ruihhlo zawrh hmanga hausate chu it loa, kan ngaihsan loh a ngai tih Central YMA president R Lalngheta chuan a sawi.
February 27 zana YMA Lengpui Branch-in YMA kumpuan – Ruihhlo Do an hawn a hmanpuinaah Central YMA president chuan, ruihhlo zuartute kan dim tur a ni loa, an sum leh pai, an neih kan it tur a ni lo, tiin, kan thalaite hraihlumtu, chhungkua ti thendarh a, chhungkua tihrehawmtu ruihhlo zuartute ngaisang lo turin mipui a chah.
“YMA hruaitute hi kan kut a fai a ngai a, hluihlawn thil la lo ang u. Kan ram hi chhan theih, chhan tlak a la awm a, kohhran leh YMA tangho ila, theihtawp chhuah tlang ang u,” a ti.
Ruihhlo ngaite hian suamhmang an tawk a ni a, an ni ho hi enkawl a, bualfaia eitur pe turin kan zavaia tanrual a ngai tih sawiin, “An tan hian rawngbawltuten ke kan pen ve tawh em, tih inzawt ang u,” a ti bawk.
Tunlai hian ganja a tam em em a, naupang te te in an ti a, hei hian a aia tha lo a hring chhuak dawn tih a sawi a ni.
February 27 zan veka Sub. Hqrs YMA Serchhip buatsaih YMA kumpuan – Ruihhlo Do hawn hmanpuitu Serchhip bawrhsap Paul L Khuma chuan, Serchhip district huap ruihhlo ngai camping hlawhtling taka neih zawh takah YMA inpekna fakawm a tih thu a sawi a. Ruihhlo ngaiten an sim theihnan tha thlah loa tang zel tur leh, a la ti ve ngai loten an tih chhin lohna turin mahni inchhung atanga bul tan theuh turin a sawm tih a sawi.
“Kan beih tur hi hrechiang ang u,” tiin, ruihhlo do kawnga awmze nei zawka hma la thei tur chuan ruihhlo chu enge a nih a, mihringah engtin nge hna a thawh tih hriatchian a, zirchian a ngai tih a sawi a ni.