Kolasib-a ruihhlo zuar thin Lalchhuankimi chu ruihhlo kaihhnawihah a awmna veng YMA branch a khin avangin an veng chhuahsan turin an ti.
YMA Kolasib Venglai East Branch thuchhuak chuan, ruihhlo laka veng then thianghlim tumin Kumpuan Sub-Committee an din a, tun ami – Lalchhuankimi te chhungkua hian an hmalakna zah loin ruihhlo an zuar a, kum 2020 hmalam, YMA Venglai East Branch din hma atangin an ni hi buaipui an ni tawh a, vawi tam man tawk tawh an nih avangin YMA Branch-in a ensan tawh an ni tih a sawi. Heti chung hian ruihhlo zawrh an siam phah loa, an chhungkua hi nu valai pakhat leh thalai pathum niin hnathawk thei vek an ni tih an sawi.
Ensan an nih hnuah man an tawh leh avangin Kolasib Venglai East huamchhung atanga chhuak tura tih an nih chu zawm loin an awm lui a, hei vang hian YMA Branch chuan vengchhunga an awm chhung chu an tu leh fate thlengin ngaihdamna awm loin an ensan tih an lo sawi tawh a ni.
Hemi hnu hian Lalchhuankimi fapa Hmangaihsanga ta nia hriat chu Sub Hqrs YMA Kolasib chuan kumin February 28 khan Rengtetlangsang Saidaitheu ramah zu zem hnih leh zu thlawr sa litre 30 an man sak a; Home-a awm tura a intiam laiin a awmna chin hriat a ni loa, a intiam anga a awm loh avangin Venglai East huamchhunga inlan tawh lo turin tih a ni tih a sawi bawk.
YMA Branch thuchhuak an zawm mai tura ngaih a nih laiin, Lalchhuankimi hian court-ah YMA hi a khing zui ta niin an thuchhuah hian a sawi a ni.
Ruihtheih thila fihlim lo nia sawiin court-ah YMA khing
