Russia beihna vanga Ukraine-a power pekna chhia siam mek
Ukrainian President Volodymyr Zelensky-a chuan Russian-ten Kyiv-a an power siam chhuahna hmunpui an beih avanga chhe nasa siam tha turin mi 200 chuang an thawk mek tih a sawi.
Khawpuiah hian apartment building 1,100 chuangin power an la nei lo niin Zelensky-a hian a sawi a, thuneitute chu an ram hmun danga harsatna tawkte pui turin a ti bawk.
Ukrainian khawchhak lam, Druzhkivka khuaah Russia-in cluster bomb hmanga a kahnaah mi pasarih an thi a, mi 15-in hliam an tuar bawk niin region hotuin a sawi bawk.
US President Donald Trump-a’n Vladimir Putin-a hnenah Ukraine-a thlasik vawt zual chhung chawlhkar khat bei lo tura a ngenna a tawp hnuah Moscow hi a thawk na thar leh mek.
Hetih lai hian US, Ukrainian leh Russian thuneitute chu inremna a awm theihna turin Abu Dhabi-ah an inbe mek bawk a. United Arab Emirates-a ram aiawhte inbiaknaah hian rah tha lam tlem chu a hawi nia sawi a ni.
Russia hian Ukraine hi February, 2022 atang khan thapuiin a rûn tan a ni.
“Vawiin khan Kyiv leh a region, Kharkiv leh a region, Sumy region leh Poltava region-ah hun khirh tak a thleng a ni,” tiin Zelensky-a hian Nilaini khan social media-ah a tar lang.
“Dnipro leh Cherkasy region telin ram lailiah pawh dinhmun a khirh hle bawk,” a ti a. Repair team chuan power beih leh theih nan rim takin an thawk tih a sawi.
Kyiv-a chengte chu an him nan metro station-ah an awm khawm a, thenkhat chuan khaw vawta an him nan puan in an kaih bawk.
Thuneitute pawhin mi an lum theih nan centre an siam a. Electricity awm lohva hman turin generator tam zawk chhawpin engineer-ten chhe lai siam hna an thawk.
Hmarchhaka Kharkiv-ah phei chuan an power plant chu siam ngaihna awm lovin a chhia.
Ukrainian Energy Minister Denys Shmyhal-a chuan an energy system siam tha turin hun an duh deuh dawn tih a sawi a. Kyiv-a Darnytsia Combined Heat & Power (CHP) plant pawh a chhe nasa pawl niin a sawi.
UK Prime Minister Sir Keir Starmer-a chuan Thawhtanni zana Ukraine-a khaw vawh lam -20°C vel a nih laia Russia-in an energy hmun a bei chu ‘a rawng lutuk’ tiin a sawi.
Russia-in a beih hnu lawka phone-a Trump-a nen an inbiaknaah Kyiv-a power plant hi a sawisel nasa a. Trump-a pawhin thuthar lakhawmtute hnenah Putin-a chu chawlhkar khat beih chawlhsan tura an inremna chungchangah ‘a thu sawia ding turin’ a ti.
Inremna chu ‘Pathiannia siam a ni a, Putin-a chu Pathianni atanga Pathianni lek inkar chawl tur a ni’ tih sawiin Russia chet dan chu tha lo a tih thu a sawi.
US president hian indo tihtawp tumin a bei nasa a, Russian president hian inkahhai puan a duh rih tlat lo thung.
Russia beihna vanga Ukraine-a power pekna chhia siam mek
