Russian-ten tun thla chhunga an beihna avangin Ukraine-a boruakalhthei hmunte chuan hna an thawk mumal thei lo va, hei vang hian Kyiv chuan ram dang atanga tam zawk lakluh a mamawh phah niin sorkar energy company chuan Ningani khan a sawi.
Ukrainian President Volodymyr Zelenskiy-a chuan Zirtawpni (India-a Inrinni zing lam) khan US Donald Trump-a a hmu dawn a, US-in energy leh ralthuam tam zawk a pek leh leitir dan tur an sawi rin a ni.
Russia hian Nilaini zan pawh khan drone 300 chuang leh missile 37 hmangin Ukraine hi a bei leh niin Zelenskiy-a chuan a sawi.
“Tun favangah hian Russian-te hian ni tin kan energy hmun min beihsak,” tiin X-ah a tar lang.
Indonain kum lina cham a thlen dawn mek laiin Russia hian kum tin thlasik apiangin Ukraine-a energy leh power siamna hmunte a bei nasa zual thin a, thlasika electricity an mamawh ang an neih theih loh chu a tum ber a ni thin a, kuminah hian an bei nasa zual.
Ukrainian sorkar energy company-a an CEO, Sergii Koretskyi-a chuan tun thla chhungin an hmun lian paruk beih a nih thu a sawi a. Nilaini zanah pawh region tam tak beiin thenkhat chuan hna an thawk thei lo tih a sawi.
“Boruakalhthei siam chhuah a tibuai a, loh theih lohvin lak luh kan ngaih phah dawn,” tiin Koretskyi-a chuan Ukrainian-te chu inren turin a ngen bawk.
Ukraine hian pawisa a ngah bik loh avangin ram dang an thawhpuite chu favang leh thlasik vawt tak an hmabakah lak luhna dappui turin an ngen.
2025-26 thlasikah hian boruakalhthei cubic metre tluklehdingawn 6.3 tal lak luh an ngai dawn a, hei pawh hi tual chhung mite hnenah khuahkhirhna awm chunga sem a ngai dawn niin gas transit operator Serhiy Makogon chuan a sawi.
Makogon-a hian energy ministry-in an chhut aia tam a chhut chhuk a, hei hi Russian-ten an beih nasat vangin lei belh an ngai nasa dawn niin a ngai a ni.
“Engkim hi Russian-te min beihnaah a innghat a. An chet nat deuh chuan kan la lut tam dawn a. Mipuite kan khuahkhirh emaw, industry leh heat & power company-te thunun emaw a ni mai,” tiin a sawi.
Russian defence ministry chuan an sipaiten Ukrainian boruakalhthei hmunte an bei nasa tih an sawi a, Kyiv-in vantlang thil a beih thin chhan letna niin a sawi bawk.
Kyiv hian tun hnaiah Russia a bei ve nasa a, Ningani pawh khan Saratov region-a tuialhthei thlitfimna an bei a ni.
Russia chet nat vangin Ukraine-in boruakalhthei lak luh tam ngai
