Russia-in India-a tuialhthei pek inpeih, a bulhnaiah inhung

Russia-in India-a tuialhthei pek inpeih, a bulhnaiah inhung
Middle East atanga chawk luhnaah harsatna awm phuhruk nan Russia chuan India-a a tuialhthei phurh luh a inpeih a, India tuipui bula lawngah thlitfim loh barrel maktaduai 9.5 vel a awm a, chawlhkar rei lo te chhungin a thleng thei dawn niin industry-a thuneitu pakhat chuan Reuters a hrilh.
Thu dawnna chuan Russia ni lo lawng hi a tir chuan khawi lam nge an pan tih erawh a sawi duh lo va; chawlhkar rei lo te hnuah India-ah an thawn theih thu sawi a ni ta a, hei hian thlifimtute chu a chhawk thei dawn a ni.
India hi tuialhthei chatlak thei mai dinhmuna ding a ni a, a dah khawl sate chuan ni 25 vel chauh a daih a, thlifimtute pawhin boruakalhthei, tuialhthei, gasoline leh liquefied petroleum gas pawh tlem chauh an nei bawk.
Indian sorkar thuchhuah chuan New Delhi hian Middle East-a ni 10–15 chhunga buaina a kal zel thei avangin inbuatsaih nan lakluhna dang a zawng mek tih a tar lang.
Tuialhthei chawk luh harsatna hian nghawng a nei nghal a, India-in tuialhthei thlitfim loh a lakluh zinga 40% vel hi khawvela thawn kualna kawng pawimawh ber pakhat, Strait of Hormuz kaltlanga a lak a ni a. He kawng hi khar tluk a nih avangin kawng dang zawn ngaiin a awm a ni.
Indian thlifimtute hian ni khatah barrel maktaduai 5.6 vel an thlifim thei a. Inrinni atanga US leh Israel-in Iran an beih tan hnua Iran hian chhan let nen a chhahvela US hmunhma leh Israel a beih nasat avangin Strait hi kaltlang thei theih loh a ni mek.
Industry-a mi pawimawh, a hming tar lan duh loh chuan Russia hian India hi a mamawh 40% thleng phuhruk tura puih a inpeih thu a sawi.
India-in January thla khan Russian tuialhthei a lakluh chu ni khatah barrel maktaduai 1.1 velin a tlahniam a, hei hi November, 2022 hnua a tlem ber tum a ni a. New Delhi-in US chhiah lak hmanga a hremna atanga chhuah nan Moscow atanga tuialhtheiu a lak luh thin chu 21.2%-a a tihniam nia sawi a ni a. February thla khan 30% velah a kai leh nia sawi a ni.
Indian thlifimtute hi Russian tuialhthei zuartu sumdawngte nen an inbe reng a; mahse, Moscow atanga lak luh tihpun a nih chuan US nena sumdawnna thila inbiakna an neih chhunzawmah nghawng a neih theih dawn avangin sorkar thutluknaah thui tak a innghat dawn niin thlifimtu pahnih chuan an sawi.
US President Donald Trump-a chuan thla hmasa khan Russia tuialhthei a leisak thin avanga India atanga bungrua a lak luh avanga hrem nana chhiah a lak chu tihhniam a remti a, New Delhi hian ‘Russia tuialhthei lei tawh loh’ a remti niin a sawi.
India erawh chuan Trump-a sawi ang hi a ni lo tih a sawi a, an kal dan chu boruak inher mil zel a nih thu sawiin ‘khawvel ram inkungkaih dan’ mil zela lak luh dan kalpui tur an nih zawk thu a sawi.
Indian foreign leh oil ministry bakah New Delhi-a Russia embassy chuan Russia atanga lei belh a awm leh awm loh a la sawi lo va. Iran-a indo a chhuah hma khan Indian company-te chu Russia tuialhthei lei tawh rih lo tura hrilh erawh an ni tih sawi a ni.
Russia hian liquefied natural gas (LNG) pawh India hnenah hralh a inpeih tih sawi a awm bawk a, hei hi New Delhi-in a lak luhna ber, Qatar-ah Thawhtanni atanga buaina zual zel avangin siam chhuah tihtawp lailawk hnuah a ni.
Indian company-te chuan a dawrtu industry thenkhat hnena boruakalhthei an pek thin an tihtlem thu Reuters chuan a tar lang bawk.
Asia-a energy hmang tam ber, China leh India hian an lak luh zatve vel hi Middle East atangin an la a. India hian China aiin dah khawl a nei tlem zawk a, US nawrna avanga Russian thil lei a tihtlem hnuah dah khawl tam a harsat zual a ni.
Trump-a chuan Thawhtanni khan US Navy-ten a tul chuan Strait of Hormuz-ah tuialhthei phurtu an hruai (escort) thei tih a sawi a, US International Development Finance Corporation chu Gulf-a thil phurhah himna pe turin a ti bawk.